काठमाडौँ । जनता समाजवादी पार्टी (जसपा)का संघीय परिषद्का अध्यक्ष डा. बाबुराम भट्टराईले ओली भाइरस गण्डकी प्रदेशमा पनि सल्केको बताएका छन् । गण्डकी प्रदेशका मुख्यमन्त्री रहेका पृथ्वी सुब्बा गुरुङले प्रधानमन्त्री केपी शर्मा ओलीको सिको गर्दै मुख्यमन्त्रीमा दाबी गरेपछि उनले यस्तो बताएका हुन् ।

डा. भट्टराईले यस प्रकारको असंवैधानिक कदमले देशको संविधान र लोकतन्त्रलाई सिध्याउने खेल भएको बताएका छन् । उनले भने, ‘ओली भाइरस पोखरामा पनि सल्केको देखियो है, यो महामारीले देशको संविधान र लोकतन्त्रलाई सिध्याउने भयो ।’

उनले सबैतिरबाट असंवैधानिक कदमको विरुद्धमा उत्रिनु पर्ने बताएका छन् । उनले थपे, ‘ अब कोही पनि ओली भाइरसबारे कुनै भ्रममा नपरौँ, सबैले सबैतिरबाट सशक्त प्रतिवाद गरौँ, ओली भाइरसलाई सदाको निम्ति अन्त्य गरौँ, संघीय लोकतान्त्रिक गणतन्त्रको रक्षा गरौँ ।’