काठमाडौँ । गण्डकी प्रदेशका निवर्तमान मुख्यमन्त्री पृथ्वी सुब्बा गुरुङले काँग्रेस नेतृत्वमा बनेको गठबन्धन सरकारको आयु लामो नभएको बताएका छन् । आज पोखरामा पत्रकार सम्मेलन गर्दै उनले गठबन्धनकै कारण गण्डकीमा एमाले नेतृत्वको सरकार ढलेको बताए ।

गुरुङले गण्डकीमा एमालेले रचनात्मक प्रतिपक्षको भूमिका खेल्ने बताए । उनले भने, ‘प्रदेशमा अव एमालेले रचनात्मक प्रतिपक्षको भुमिका खेल्छ । गुटउपगुटमा विभाजित अप्राकृतिक यो गठबन्धन पूर्वपश्चिम फर्केको छ । कुर्सी प्राप्तिमा गरिने गठबन्धनमा केही न केही झगडा हुन्छ र गठबन्धनको आयु लामो छैन ।’ उनले प्रदेश सभा ५ वर्ष चल्नुपर्ने मान्यतामा आफू रहेको बताए । उनले आफुले गरेको मुख्यमन्त्रीमा दाबी पेशलाई गलत अर्थले प्रचारबाजी गराएको बताए ।

उपधारा ५ अनुसार प्रदेशका सबै सदस्यले दाबी गर्न पाउने व्यवस्था रहेकाले आफूले पनि दाबी गरेको उनले बताए । सहज प्रक्रियामार्फत सरकार परिवर्तन भएको भन्दै उनले नवनियुक्त मुख्यमन्त्री कृष्णचन्द्र पोखरेललाई संघीयताको मर्मअनुसार काम गर्न सुझाव दिएका छन् ।