काठमाडौँ । जनता समाजवादी पार्टी (जसपा)को अध्यक्ष महन्थ ठाकुरसमूहले पार्टीका निवर्तमान सांसदहरूको बैठक बोलाएको छ । पार्टीको बबरमहलस्थित कार्यालयमा बिहीबार दिउँसो एक बजे अध्यक्ष ठाकुर र संसदीय दलका नेता राजेन्द्र महतोले निवर्तमान सांसदहरूको बैठक बोलाएका हुन् ।

उनी पक्षीय एक नेताका अनुसार सर्वोच्च अदालतले मंगलबार दिएको अन्तरिम आदेश, प्रतिनिधि सभा विघटनविरुद्ध परेको रिटमा संवैधानिक इजलासमा भइरहेको बहस र पार्टीको आन्तरिक किचलोबारे छलफल हुनेछ ।

केपी शर्मा ओली नेतृत्वको सरकारको सिफारिसमा राष्ट्रपति विद्यादेवी भण्डारीले गरेको प्रतिनिधि सभा विघटनलाई समर्थन गर्ने कि बदर गर्न माग गर्ने भन्ने विषयमा जसपामा विवाद छ ।