काठमाडौँ । निवर्तमान प्रधानमन्त्री केपी शर्मा ओली सरकारले यातायात व्यवसायीहरूलाई उपहार दिएका छन् । सरकारबाट जाँदै गर्दा यातायात व्यवस्था विभागले बनाएको कार्यदलले तयार पारेको प्रतिवेदनअनुसार २० देखि २८ प्रतिशतसम्म भाडा बढाउन यातायात व्यवसायीलाई ढोका खोलिदिएको हो ।

गत असार २७ गते तत्कालीन भौतिक पूर्वाधार तथा यातायातमन्त्री बसन्त नेम्वाङको मन्त्रीस्तरीय निर्णयबाट अन्तर प्रदेश चल्ने सार्वजनिक यातायातको भाडादर कायम गरिएको यातायात व्यवस्था विभागले जनाएको छ ।

ओली नेतृत्वको सरकारले पेट्रोलियम पदार्थ र गाडीका पार्टपूर्जाको मूल्यवृद्धिलाई आधार बनाएर २० देखि २८ प्रतिशतसम्म भाडा बढाउन अनुमति दिएको हो ।

सरकारले यात्रुवाहक सवारीमा २८ प्रतिशत, पहाडी बाटोमा सञ्चालन हुने मालवाहक सवारीमा २० प्रतिशत र तराईको बाटोमा सञ्चालन हुने मालवाहक सवारीमा २६ प्रतिशत भाडा वृद्धि गरिएको हो ।