काठमाडौं । प्रहरी प्रधान कार्यालयले कार्यसम्पादन मूल्याङकनको नजिता सार्वजनिक गरेको छ । बुधबार पत्रकार सम्मेलन गर्दै प्रधान कार्यालयले प्रहरी महानिरक्षिक (एआईजी)देखि प्रहरी नायब महानिरीक्षक (डिआईजी)सम्मको नम्बर सार्वजनिक गरेको हो ।

प्रहरी महानिरीक्षक शैलेश थापा क्षेत्रीले गृहसचिव महेश्वर न्यौपानेसँग कार्यसम्पादन सम्झौता गरेका थिए । उनले एक सय पूर्णाङकमा ९०.५ नम्बर ल्याएका छन् । एआइजीहरुमध्ये हरि बहादुर पालले उत्कृष्ट नम्बर ल्याएका छन् र डिआईजीहरु मध्य वसन्त लामाले उत्कृष्ट नम्बर ल्याएका छन् ।

एआईजी पालको नेतृत्वमा रहेको महानगरीय प्रहरी कार्यालयले ९५.८९ प्रतिशत ल्याएको छ । मानव स्रोत तथा प्रशासन विभागका एआइजी निरज बहादुर शाहीले ६७.११, कार्य तथा अपराध अनुसन्धानका विश्वराज पोखरेलले ६६.५२, राष्ट्रिय प्रहरी प्रशिक्षण प्रतिष्ठानका एआइजी प्रद्युम्न कार्कीले ६६.७९ तथा प्रहरी अस्पतालकी डा.आशा सिंहले ७९.१७ नम्बर ल्याएकी छन् ।

डिआईजी तर्फ उत्किृष्ट नम्बर ल्याउने वसन्त लामाको नेतृत्वमा रहेको बाग्मती प्रदेशले ९७.०३ नम्बर ल्याएका छन् । त्यस्तै दोस्रोमा लुम्बिनी प्रदेश, तेस्रोमा गण्डकी, चौथोमा प्रदेश नम्बर १, पाँचौमा प्रदेश नम्बर २, छैठौंमा सुदुरपश्चिम तथा सातौंमा कर्णाली प्रदेशका डिआईजी भएका छन् ।

लुम्बिनीले ९६.५६, गण्डकीले ९६.०३, प्रदेश नम्बर १ ले ९५.९०, प्रदेश नम्बर २ ले ९५.७४, सुदुरपश्चिम प्रदेशले ९५.२१ र कर्णाली प्रदेशले ९४.९६ नम्बर ल्याएको छ ।

त्यस्तै दोस्रो हुने लुम्बिनीमा डिआइजी रबिन्द्र धानकु, तेस्रो हुने गण्डकीमा घनश्याम अर्याल, चौथो हुने प्रदेश नम्बर १ मा ईश्वरबाबु कार्की, पाँचौ हुने प्रदेश नम्बर २ मा धिरजप्रताप सिंह, छैठौं हुने सुदुरपश्चिममा उत्तम सुवेदी तथा सातौ हुने कर्णालीमा बसन्त पन्त थिए ।