काठमाडौं । स्टक एक्सचेञ्जमा आबद्ध कम्पनीको शेयर कारोबार मापक नेप्से परिसुचक कारोबार हुने साताको अन्तिम दिन बिहीबार दोहोरो अंकले घटेको छ ।

नेप्से परिसुचक १६ अंकले घटेर ३ हजार १ सय ७ दशमलब ४५ बिन्दुमा पुगेको स्टक एक्सचेञ्जले जनाएको छ । यो अघिल्लो दिनको तुलनामा शुन्य दशमलब ५१ प्रतिशत कम हो ।

कारोबार भएका मध्ये अपर तामाकोशीको ६५ करोड ३० लाख, अपि पावरको ५८ करोड ४२ लाख, अरुण भ्याली हाइड्रोको ४९ करोड १७ लाख, फर्स्ट माइक्रोफाइनान्सको ३१ करोड ७३ लाख, र अरुण काबेलीको २८ करोड ६७ लाख बराबरको खरिदबिक्रि भएको छ ।

बिहीबार विकास बैंक समुहको बाहेकका सबै समुहगत सूचक घटेका छन् । विकास बैंक समुह भने २ दशमलब २४ प्रतिशतले बढेको छ । हाइड्रोपावर समुह सबैभन्दा धेरै २ दशमलब १६ प्रतिशतले घटेको छ ।

कारोबार भएकामध्ये १ सय ३२ कम्पनीको शेयर मूल्य घटेको छ भने ५२ कम्पनीको शेयर मूल्य बढेको स्टक एक्सचेञ्जले जनाएको छ ।

स्टक एक्सचेञ्जका अनुसार बिहिबार कारोबारमा आएका २ सय २६ कम्पनीका १ लाख ३५ हजार ४२ कारोबारबाट १४ अर्ब ३१ करोड ६२ लाख ४९ हजार ९ सय ६५ रुपैयाँ बराबरको २ करोड ८८ लाख ४५ हजार ४ सय ३१ कित्ता शेयर किनबेच भए । यस्तै, भोलि (साउन २२ गते, शुक्रबार) र पर्सी (साउन २३ गते, शनिबार) नेपाल स्टक एक्सचेञ्ज नेप्सेको वेभसाइटको सेवाहरू सबै बन्द हुने भएको छ ।

डाटा स्तरोन्नतिको काम गर्न लागिएको हुनाले २ दिन सिस्टमहरू नचल्ने नेप्सेले जानकारी दिएको छ । नेप्सेले आफ्नो पुरानो वेभसाइटलाई पूर्ण रुपमा विस्थापन गर्ने तयारी गरेको छ ।