काठमाडौं । नेकपा एमालेका अध्यक्ष केपी शर्मा ओलीले एमसीसी संशोधन गरेर पारित हुनुपर्ने बताएका छन् । पार्टीको केन्द्रीय कमिटी बैठकलाई सम्बोधन गर्दै ओलीले एमसीसी संशोधनसहित पास हुनुपर्ने बताएका हुन् ।

सत्तामा हुँदा कुनै पनि हालतमा एमसीसी पारित हुनुपर्ने बताउदै आएका ओलीले सत्ताबाट बाहिरिएसँगै एमसीसी संशोधन गरेर मात्रै पारित हुनुपर्ने बताएका हुन् ।

१ सय ६५ को विश्वासको मतले पास गर्दा भइहाल्यो किन हामीलाई दोष दिएको भन्दै उनले सत्तारुढ दललाई प्रश्न गरेका छन् ।

उनले भने, ‘हामी त स्पष्ट छौँ । हाम्रो पार्टीले बनाएको कार्यदलले दिएको सुझाव र बुद्धिजीवी र विज्ञहरूले दिएको सुझावहरूको आधारमा जनताको भावना अनुसार संशोधन सहित पास हुनु पर्दछ ।’

उनले सरकारकोे भूमिहीन र सुकुम्वासी समस्या समाधान आयोग खारेज गर्ने निर्णयको विरोध गरेका छन् । आफ्नो नेतृत्वको सरकारले धरहरा, रानी पोखरी बनाउने देखि मेलम्चीको पानी काठमाडौँसम्मै ल्याएको भन्दै उनले ती पनि भत्काउन सरकारलाई चेतावनी दिए ।