हेटौंडा । सडक डिभिजन कार्यालय हेटौंडाले गत आर्थिक वर्ष २०७७/०७८ मा बारा, पर्सा र मकवानपुर जिल्लामा आठ पक्की पुल निर्माण गरेको छ ।

ती जिल्लाको सवारी वारपार गर्न समस्या भएका स्थानमा पुल निमार्ण गरेर सञ्चालनमा ल्याएको कार्यालय प्रमुख खड्गलाल श्रेष्ठले जानकारी दिए । साथै संघीय सरकारअन्तर्गत रहेको उक्त कार्यालयले गत आवमा नै ३२.३६ किलोमिटर सडक कालोपत्र गरेको छ ।

त्यस्तै १९.१० किमी सडक ग्राभेलसमेत गरेको छ । साथै ती जिल्लामा कूल ३७.३५ किमी सडक मर्मत गरेको छ ।

राजमार्ग स्तरोन्नति तथा पुनःस्थापना कार्यक्रमअन्तर्गत २०.६५ किलोमिटर र रणनीतिक सडक मर्मतसम्भार सडक बोर्डअन्तर्गत १६.७० किलोमिटर सडक मर्मत गरिएको कार्यालयका सूचना अधिकारी लोमस उपाध्यायले जानकारी दिए ।

कार्यालयको गत आव २०७७/०७८ मा संशोधित बजेट एक अर्ब ७० करोड रहेकामा एक अर्ब १६ करोड ती पूर्वाधार विकास निर्माणमा खर्च भएको उनले बताए ।

यसैबीच हेटौंडा उपमहानगरपालिका–६ स्थित शान्तिटोलमा १७ लाख लागतमा शान्तिटोल विकास संस्थाका लागि भवन निर्माण गरिएको छ । उपमहानगरपालिको सात लाख र विभिन्न संघसंस्था र व्यक्तिको सहयोगमा सो भवन निर्माण भएको संस्थाका अध्यक्ष केशव धितालले जानकारी दिए ।