काठमाडौँ । लुम्बिनी प्रदेशका मुख्यमन्त्री शंकर पोखरेलले पदलबाट राजीनामा दिएका छन् । प्रदेश प्रमुख अमिक शेरचनलाई भेटेर उनले राजीनामा दिएका हुन ।

पोखरेल विरुद्ध विपक्षी गठवन्धन कांग्रेस, माओवादी, जसपा र राष्ट्रिय जनमोर्चाका सांसदहरुले प्रदेश सभा सचिवालयमा अविश्वास प्रस्ताव दर्ता गराएका थिए ।

त्यसपछि विपक्षी गठवन्धनकै नेताहरले प्रदेश प्रमुख अमिक शेरचनकाहा पुगी विशेष अधिवेशन बोलाउन समावेदन पत्र पनि दर्ता गराएका थिए । सोही आधारमा प्रदेश प्रमुख शेरचनले आजै दिउँसो १ वजेको लागि प्रदेश सभाको विशेष अधिवेशन आह्रवान गरिदिएका थिए ।

विशेष अधिवेशन रोक्न माग गदै एमाले तर्फका प्रदेश सदस्य लिला गिरीले सर्वाेच्चमा रिट समेत दर्ता गराएका थिए । तर रिटमा मंगलवार हेर्न नभ्याईएको सूचिमा परेको थियो भने आज पनि इजालसको आठौं नम्वरमा छ ।

जसकाकारण निर्धारित मितिमै प्रदेश सभाको विशेष अधिवेशन हुने देखिएपछि मुख्यमन्त्री पोखरेलले केही समय अगाडी मात्रै मुख्यमन्त्री पदवाट प्रदेश प्रमुखलाई राजीनामा वुझाएका हुन् ।

प्रदेशसभामा हाल ८० जना सांसद बहाल रहेकोमा बहुमतका लागि ४१ सिट आवश्यक हुन्छ । तर सत्तारुढ दल एमालेसँग अहिले ३८ सांसद मात्रै छन् । विपक्षी गठवन्धनसँग कांग्रेसका १९, मामाओवादीका १८, जसपाका ३ र जनमोर्चाका १ गरी ४१ सांसद छन् ।

संसदमा मुख्यमन्त्री विरुद्धको अविश्वास प्रस्ताव पेश हुदा उनले विश्वासको मत पाउने अवस्था थिएन । त्यही देखेपछि उनले राजीनामा दिएका हुन् ।

संसदमा अविश्वास प्रस्ताव फेस गर्ने या राजीनामा दिएर जाने भन्ने विषयमा विहान वसेको मन्त्रिपरिषद्को बैठक र एमाले प्रदेश सभा दलको वैठकले समेत मुख्यमन्त्री पोखरेललाई नै अधिकार दिएको थियो । तर मुख्यमन्त्रीले अन्तिम समयमा राजीनामा दिने निर्णय लिएपछि राजीनामा वुझाएको प्रदेश सरकारका प्रवक्ता बैजनाथ चौधरीले जानकारी दिए।

पोखरेल मुख्यमन्त्रीमा २०७४ फागुन ३ गते नियुक्त भएका थिए । तत्कालीन प्रदेश प्रमुख उमाकान्त झाले एमाले संसदीय दलका नेता पोखरेललाई संविधानको धारा १६८ को उपधारा २ बमोजिम मुख्यमन्त्रीमा नियुक्त गरेका थिए ।

त्यसवेला पोखरेललाई माओवादी केन्द्रको साथ र समर्थन थियो ।

तर पछि माओवादी केन्द्रले समर्थन फिर्ता लिएर अविश्वास प्रस्ताव दर्ता गरेपछि पोखरेलले १९ वैशाख २०७८ मा पनि राजीनामा दिएका थिए ।

त्यसपछि उनले संविधानको धारा १६८ (१) अनुसार आफनो दलको मात्र एकल वहुमत रहेको दावी सहित मुख्यमन्त्रीमा दावी गरेका थिए । उनको दावीलाई तत्कालिन प्रदेश प्रमुखले स्वीकार गरी एउटै दलको वहुमतको सरकारका रुपमा पोखरेललाई पून नियुीक्त दिएका थिए ।

त्यसयता पनि उनी अल्पमतमा रहेको र अल्पमतमा रहदा रहदै पनि प्रदेश प्रमुखले मुख्यमन्त्री नियुक्त गरेको भन्दै विपक्षी गठवन्धनले असन्तुष्टि जनाईरहेको थियो ।

अहिले अविश्वास प्रस्ताव नै फेस गर्नुपर्ने अवस्था आएपछि उनले राजीनामा दिएका हुन् ।