काठमाडौँ । लुम्बिनी प्रदेशमा नयाँ सरकार गठनका लागि आह्वान गरिएको छ । बुधबार प्रदेश प्रमुख अमिक शेरचनले बहुमतको नयाँ सरकार गठन गर्न २४ घण्टाको लागि आह्वान गरेका छन् ।

मुख्यमन्त्री शंकर पोखरेलले राजीनामा दिएपछि प्रदेश प्रमुख शेरचनले साउन २८ गते दिउँसो ३ बजेसम्म बहुमतको सरकार गठनका लागि दाबी पेश गर्न आह्वान गरेका हुन् । प्रदेश प्रमुख शेरचनले संविधानको धारा १६८ (२) अनुसार प्रदेशसभामा प्रतिनिधित्व गर्ने दुई वा दुईभन्दा बढी दलहरुलाई नयाँ सरकार गठनका लागि आह्वान गरेका हुन् ।

प्रदेश प्रमुखले बहुमत दाबी पेस गर्ने प्रदेशसभा सदस्यलाई मुख्यमन्त्रीमा नियुक्त गर्न बिहीबार दिउँसो ३ बजेभित्र दाबी पेश गर्न आह्वान गरेका हुन् । मुख्यमन्त्री पोखरेलविरुद्ध विपक्षी गठबन्धन नेपाली कांग्रेस, नेकपा माओवादी केन्द्र, जनता समाजवादी पार्टी र राष्ट्रिय जनमोर्चाले अविश्वास प्रस्ताव दर्ता गरेका थिए ।

उक्त अविश्वासको प्रस्तावमा आज प्रदेशसभामा छलफल गर्न प्रदेश सभाको विषेश अधिवेशन आहवान गरिएको थियो । तर, मुख्यमन्त्री पोखरेलले राजीनामा दिएपछि प्रदेश प्रमुखले नयाँ सरकार गठनका लागि आह्वान गरेका छन् ।