काठमाडौँ । नेकपा एमालेका अध्यक्ष केपी शर्मा ओलीले पार्टी एकताका लागि आह्वान गरेका छन् । उनले नेकपा एमाले र कम्युनिष्ट आन्दोलनलाई नै समाप्त पार्ने गरी षड्यान्त्र भइरहेको भन्दै पार्टीका सबै नेता तथा कार्यकर्तालाई पार्टी एकताको पक्षमा उभिन आह्वान गरेका हुन् ।

सोमबार साँझ बसेको एमालेको शीर्ष नेताहरू आन्तरिक छलफलपछि विज्ञप्ति जारी गर्दै अध्यक्ष ओलीले पार्टीका वरिष्ठ नेता माधव कुमार नेपाल पक्षलाई पार्टी एकतामा समाहित हुन आग्रह गरेका हुन् । सरकारले राजनीति दल विभाजनसम्बन्धि अध्यादेश ल्याउने तयारी गरेपछि ओलीले पार्टी एकतबारे विज्ञप्ति जारी गरेका हुन् ।

सोमबार बसेको मन्त्रिपरिषद बैठकले संसद अधिवेशन अन्त्य गर्न राष्ट्रपतिसमक्ष सिफारिस गर्ने निर्णय गरेको थियो । सरकारले संसद अधिवेशनको अन्त्य गरेर राजनीतिक दल विभाजनसम्बन्धि अध्यादेश ल्याउन लागेको बताउँदै गर्दा अध्यक्ष ओलीले दल विभाजनको प्रयासविरुद्ध प्रतिनिधिसभाका सदस्य, नेता तथा कार्यकर्तालाई एक ठाउँमा आह्वान गरेका हुन् ।

सरकारले एमालेका नेता नेपाल पक्षलाई सहज हुने गरी दल विभाजनसम्बन्धि अध्यादेश ल्याउन तयारी गरिरहेको छ ।