काठमाडौं । नेपालमा गरिबीको संख्यामा कमी आएको । राष्ट्रिय योजना आयोगका अनुसार सन् २०१९ मा गरिबीको संख्या घटेको हो । सन् २०१९ मा बहुआयामिक गरिबीको रेखामुनी रहेको जनसंख्या १७.४ प्रतिशतमा झरेको आयोगले जनाएको छ ।

आयोगले बुधबार सार्वजनिक गरेको बहुआयामिक गरिबी सूचक प्रतिवेदन २०१९ (मल्टिडाइमेनसनल पोभर्टी इन्डेक्स २०१९)का अनुसार अब नेपालमा १७.४ प्रतिशत मानिस गरिबीको रेखामुनी रहेका छन् ।

बहुआयामिक गरिबी एक वर्षमा ११% ले घटेर १७.४ प्रतिशतमा पुगेको हो । सन् २०१८ मा २८.६ प्रतिशत मानिस बहुआयामिक गरिबीको रेखामुनी रहेका थिए ।

आयोगको प्रतिवेदनअनुसार ग्रामीण भेगका २८ प्रतिशत जनसंख्या बहुआयामिक गरिबीको रेखामुनी छन् । यस्तै सहरी क्षेत्रमा १२.३ प्रतिशत जनसंख्या बहुआयामिक गरिबीको रेखामुनी छन् ।

आयोगको प्रतिवेदन अनुसार गरिबीको दर सबैभन्दा धेरै कर्णाली प्रदेशमा देखिएको छ । कर्णाली प्रदेशका ३९.५ प्रतिशत मानिस गरिबीको रेखामुनी रहेका छन् । दोस्रोमा सुदूरपश्चिम प्रदेश रहेको छ । त्यहाँको २५.५ प्रतिशत जनसंख्या बहुआयामिक गरिबीको रेखामुनी देखिएको छ ।

१५औं पञ्चवर्षिय आवधिक योजनाले आर्थिक वर्ष २०८०/८१ सम्ममा बहुआयामिक गरिबी ११.५ प्रतिशतमा झार्ने लक्ष्य राखेको योजना आयोगले जनाएको छ ।