काठमाडौं । रुकुमको चौरजहारी विमानस्थलमा स्तरोन्नती योजना बनेको छ । जसको धावनमार्ग निर्माणको तयारी भएको नेपाल नागरिक उड्ययन प्राधिकरणले जनाएको छ ।

उक्त विमानस्थलमा हाल नेपाल वायुसेवा निगमको १९ सिट क्षमताको ट्विनअटर जहाज मात्रै आउजाउ गर्दै आएको उक्त विमानस्थलमा ४० सिट क्षमताको एटीआर ४२–६०० सिरिजका जहाजमार्फत उडान सञ्चालन गराउने उद्देश्य प्राधिकरणको रहेको छ । यद्यपि योजना पारित भएर कार्यान्वयनमा भने गइसकेको छैन ।

हाल ६ सय मिटर लम्बाई र २० मिटर चौडाइ रहेको विमानस्थलको धावनमार्ग १२ सय मिटर लम्बाई र ३० मिटर चौडाइमा विस्तार गर्ने योजना छ । पुरानो र दुर्गम क्षेत्रलाई सेवा दिने विमानस्थल भए पनि साँघुरो हुँदा यहाँ हवाई सेवा कम्पनीहरु आफ्नो उडानका लागि उत्साहित छैनन् ।

विमानस्थलको भावनमार्ग विस्तारसँगै भवन संरचना र सुविधा पनि थप गरिने प्राधिकरणका वरिष्ठ इन्जिनियर एवं निर्देशक प्रदीप अधिकारीले बताए । प्राधिकरणका अनुसार चौरजहारी विमानस्थल विस्तारका लागि दुई विकल्प छ। जसमा रनवेको एक हजार र १२ सय मिटरमा विस्तारको छ ।

पहिलो विकल्प अन्तर्गत धावनमार्ग एक हजार मिटर लम्बाइ र २० मिटर चौडाइ विस्तारका गर्दा जग्गा अधिग्रहणमा मात्र साँढे ३४ करोड रुपैयाँभन्दा बढी लागत अनुमान गरिएको छ । यो बाहेक धावनमार्ग, भवन, पार्किङ लगायत पूर्वाधार तयारीका लागि थप ४० करोड लागत अनुमान गरिएको छ ।
दोस्रो विकल्प अन्तर्गत विमानस्थलको लम्बाई १२ सय मिटर र चौडाइ ३० मिटरमा विस्तार गर्ने भन्ने छ । यसमा जग्गा अधिग्रहणका लागि मात्र ८८ करोड रुपैयाँ लागत आउने अनुमान गरिएको छ । यसबाहेक विमानस्थलको धावनमार्ग, भवन संरचना,पार्किङ लगायत पूर्वाधार तयार गर्नका लागि थप ५० करोडको लागत पर्ने अनुमान छ ।

प्राधिकरणले तयार पारेको विवरण अनुसार यो क्षेत्रमा अहिले जग्गाको भाउ प्रति आना दुई लाख रुपैयाँ छ । जेटस्ट्रिम, ट्विनअटर लगायत साना जहाजमार्फत उडान हुँदै आएको यो विमानस्थल एटीआर–७२ आउजाउ हुने गरी विस्तार गर्ने योजनामा काम भइरहेको प्राधिकरणले जनाएको छ । अर्थमन्त्री जनार्दन शर्माको पहलमा यो विमानस्थलको स्तरोन्नति गर्न लागिएको प्राधिकरणको दाबी छ ।

चौरजहारी विमानस्थल वि.सं. २०२४ सालमा निर्माण भएको हो ।