काठमाडौँ । सिसिटीटिभी मनिटर कम्प्युटरको नाममा भित्रिदा एक वर्षमा १६ करोड १६ लाख ६१ हजार राजस्व गुमेको छ । महालेखा परीक्षकको ५८ औँ प्रतिवेदनले भन्सार दर बढी रहेका सिसिटिभी मनिटर सबै कम्प्युटरको नाममा भित्रिएको भन्दै राजस्व गुमेको देखाएको हो ।

४६ करोड ९२ लाख हजार मूल्य बराबरका १९ इञ्च वा सोभन्दा कम आकारका ७३ हजार २६ थान मनिटर भित्रिएकोमा त्यसको १३ प्रतिशत मूल्य अभिवृद्धि कर मात्र असुल गरी जाँचपास गरेको प्रतिवेदनले जनाएको छ ।

सुख्खा बन्दरगाह भन्सार कार्यालयबाट ४ हजार थान सिसिटिभी क्यामेरासहित त्रिभुवन अन्तर्राष्ट्रिय विमानस्थल, वीरगञ्ज, तातोपानीलगायतका भन्सार कार्यालयबाट गत वर्ष १३ करोड २१ लाख १० हजार रुपैयाँका ६७ हजार ९ सय ४ थान क्यामेरा पैठारी भएको महालेखा परिक्षकको प्रतिवेदनमा उल्लेख छ ।

यस हिसाबले आयातित मनिटर सिसिटिभीमा समेत प्रयोग हुने देखिन्छ । तर, भन्सारको तथ्यांक परीक्षणका क्रममा भने कुनै मनिटर उक्त प्रयोजनका लागि पैठारी भएको नदेखिएको प्रतिवेदनमा उल्लेख छ ।

कम्प्युटरबाहेकको प्रयोजनमा प्रयोग हुने मनिटरलाई भन्सार दरबन्दीबाट जाँचपास गरी ३० प्रतिशत भन्सार महशुल र मूल्य अभिवृद्धि कर असुल गर्नु पर्नेमा फरक भन्सार दरबन्दीबाट जाँचपास गरेका कारण १६ करोड १६ लाख ६१ हजार रुपैयाँ राजस्व गुमेको हो ।