काठमाडौँ । गत शनिबारदेखि काठमाडौँमा सुरु भएको नेकपा माओवादी केन्द्रको भातृ संगठन वाइसिएल नेपालको नयाँ केन्द्रीय समिति घोषणा भएको छ । भेलाले दुई सय ३१ जना सदस्य हुने गरी केन्द्रीय समितिको घोषणा गरेको हो ।

घोषणा भएको केन्द्रीय समितिमा अध्यक्ष र महासचिवसहित १० प्रतिशत मनोनित सदस्यको टुंगो लगाउन बाँकी रहेको छ ।

वाइसिएलको अध्यक्षका मुख्य दाबेदार सुवोध सेर्पाली र सुमन देवकोटाले आ–आफ्नो दाबी पेश गरेसँगै अध्यक्षको विषय टुंगाउन कठिन भएको हो । यसैगरी, महासचिवमा कसम गुरुङ र नवराज ढुंगानाले दाबी गर्दै आएका छन् ।

अध्यक्ष र महासचिवको विषय टुंग्याउन वाइसिएलका नेताहरू पार्टी अध्यक्ष पुष्पकमल दाहाल ‘प्रचण्ड’लाई भेट्न आज प्रचण्ड निवास खुमलटार पुगेका थिए । प्रचण्डले केन्द्रीय समितिको घोषण गर्न भनेसँगै भेलाले केन्द्रीय समिति घोषणा गरेको हो ।

यस्तै, प्रचण्डले आगामी पाँच दिनभित्र वाइसिएल केन्द्रीय समितिको बैठक आह्वान गर्न निर्देशन दिएको छ । उनले सोही बैठकमा आफूसमेत उपस्थित भई अध्यक्ष र महासचिवको टुंगो लगाउने वाइसिएल नेताहरूलाई बताएका थिए ।

भेलामा उपस्थित प्रतिनिधिहरू अध्यक्षमा सेर्पाली र महासचिवमा ढुंगानाको पक्षमा भए पनि नेताहरूले फरक नेतृत्वलाई अगाडि ल्याउने भएसँगै नेतृत्व चयनमा कठिन भएको हो ।

भर्चअुल विधिबाट दुई दिनमा सक्ने गरी सुरु भएको भेला अध्यक्ष र महासचिव नटुंगिदा ४ दिनसम्म जारी रहेकाे छ ।