काठमाडौैं । मौद्रिक नीतिले कर्जाको सीमा तोकेसँगै शेयर बजारमा बिक्री चाप बढ्न थालेको छ । जसले गर्दा पछिल्लो समय शेयर कारोबार ऋणात्मक बन्दै गएको छ ।

काराबार हुने साताको तेस्रो दिन आज मंगलबार शेयर कारोबार मापक नेप्से परिसुचक ६९ दशमलब ५ बिन्दुले ओरालो लागेर २ हजार ९ सय ७५ दशमलब ८४ बिन्दुमा पुगेको छ । यो अघिल्लो दिनको तुलनामा २ दशमलब २७ प्रतिशतले कमी हो ।

कूल २ सय २७ कम्पनीको १ लाख ३० हजार ७ सय ७४ कारोबारबाट १३ अर्ब २५ करोड ९६ लाख ९६ हजार १ सय ७ रुपैयाँ बराबरका २ करोड ३१ लाख ९ हजार ७ सय १३ कित्ता शेयर किनबेच भएको स्टक एक्सचेञ्जले जनाएको छ ।

उच्च रुपमा ओरालो लागेको बजारमा सबैभन्दा बढी बीमा समुहको परिसुचक घट्न पुगेको छ । जसमा जीवन बीमा समुहको परिसुचक ४ सय ४७ अंकले घट्दा निर्जीवन बीमा समुहको परिसुचकमा ३ सय ७२ अंकको गिरावट आएको छ ।

शेयर बजारमा बिकास बैंक समुहको परिसुचक २ सय ५ अंकले घट्दा जलविद्युत समुहको परिसुचकमा १ सय २४ अंकको गिरावट आएको छ ।

यस्तै बजारमा सबैभन्दा बढी प्रभुत्व रहेको बैंकिङ समुहको परिसुचकमा २२ अंकको गिरावट आउँदा उत्पादनमुलक १ सय ९८ र फाइनान्स समुहको परिसुचक १ सय १ अंकले ओरालो लागेको छ ।

लगानीकर्ता नवराज अधिकारीले भने ‘ठूलो मात्रामा कर्जा लिएर शेयर खरिद गरेका लगानीकर्ताले बिक्रि गर्न थाल्दा शेयरमा नकारात्मक सन्देश देखिएको हो ।’