काठमाडौँ । नेकपा एमालेले सभामुख अग्निप्रसाद सापकोटा र निर्वाचन आयोगविरुद्ध सर्वोच्च अदालतमा रिट निवेदन दायर गरेको छ । बुधबार एमालेले सर्वोच्च अदालतमा तीनवटा रिट निवेदन एकसाथ दर्ता गरेको बताइएको छ ।

एमालेले १ भदौमा १४ सांसदलाई कारबाही गरी संसद सचिवालयमा पत्र पठाए पनि सभामुखले कारबाही नहुने भनी गरेको निर्णय, कारबाही गरिएका १४ सांसदको सनाखत गरी नेकपा एकीकृत समाजवादी पार्टी दर्ता र दिल्लीमा रहेका झलनाथ खनालको वारेसमार्फत सनाखत गरिएको भन्दै निर्वाचन आयोगको निर्णयविरुद्ध एमालेले सर्वोच्चमा रिट दर्ता गरेको हो ।

यस्तै एमालेले रिट निवेदनमा लुम्बिनी प्रदेशका दुई सांसद अजय शाही र विमला खत्री वलीलाई पार्टीले कारबाही गर्दै पदमुक्त गर्न प्रदेशसभा सचिवालयमा पत्र पठाएको तर सभामुखले कारबाही नगरेको भन्दै सभामुखको निर्णय बदर गर्न माग गरिएको छ ।