काठमाडौं । सरकारले असोज १ गतेदेखि सस्तो पसल सञ्चालन गर्ने भएको छ । दशैंलाई लक्षित गरी देशैभर ८१ वटा सस्तो पसल सञ्चालन गर्न लागिएको उद्योग वाणिज्य तथा आपूर्ति मन्त्रालयले जनाएको छ ।

उद्योग वाणिज्य तथा आपूर्ति मन्त्रालयमा मंगलबार बसेको बैठकले साल्ट ट्रेडिङ र खाद्य व्यवस्था तथा व्यापार कम्पनीमार्फत सस्तो सहुलियत दरको पसल सञ्चालन गर्ने निर्णय गरेको मन्त्रालयले जनाएको छ ।

असोज १ गतेबाट असोज २४ गतेसम्म काठमाडौं उपत्यकासहितका ४० जिल्लामा खाद्य व्यवस्था तथा व्यापार कम्पनीको ४३ वटा र साल्ट ट्रेडिङले सञ्चालन गर्ने ३८ वटा सहुलियत पसल सञ्चालन हुने मन्त्रालयले बुधबार जारी गरेको विज्ञप्तिमा उल्लेख छ ।

दशैं लक्षित सहुलियत पसल सञ्चालन गर्न मन्त्रालयले खाद्य व्यवस्था तथा व्यापार कम्पनी तथा साल्ट ट्रेडिङलाई परिपत्र गरिसकेको जनाएको छ ।

सहुलियत पसलमा खसी र च्याङ्ग्राको साथै नून चामल, तेल, दाल, चिउरा, लगायतका दैनिक उपभोग्य वस्तुहरु पाउन सकिन्छ ।

खाद्यको काठमाडौंमा रामशाहपथ, थापाथली, नख्खु र केन्द्रीय कार्यालयमा सहुलियत पसल हुनेछ भने अन्य ३९ पसल उपत्यका बाहिरका ४० जिल्ल्लामा सञ्चालनमा आउने जनाइएको छ ।