काठमाडौँ । प्रधानमन्त्री शेरबहादुर देउवा र नेकपा (एकीकृत समाजवादी)का वरिष्ठ नेता पूर्वप्रधानमन्त्री झलनाथ खनालबीच सोमबार भेटवार्ता भएको छ । प्रधानमन्त्री देउवा अपरान्ह पाँच बजे खनाल निवास डल्लुमा पुगेका थिए ।

झण्डै ४५ मिनेट भएको वार्तामा प्रधानमन्त्री देउवाले खनालको स्वास्थ्य स्थितिबारे जानकारी लिनुका साथै पछिल्लो राजनीतिक परिस्थितिबारे छलफल गरेका थिए ।

‘प्रधानमन्त्रीज्यू पूर्वप्रधानमन्त्री खनालको स्वास्थ्य स्थिति बुझ्न उहाँको निवास डल्लुमा पुग्नु भएको हो,’ बालुवाटार स्रोतले भन्यो, ‘अन्य कुनै कारण थिएन, उहाँलाई भेट्न जान ।’

यसअघि पनि खनाल उपचारबाट फर्किएपछि देउवा खनाल निवासमै पुगेर भेट गरेका थिए ।