दैलेख । दैलेखमा एक युवतिले शिक्षकको घाँटी रेटेर हत्या गरेको खुलासा भएको छ ।

दैलेखको मालिका माविका सामाजिक विषयका शिक्षक नगेन्द्र कुमार विसीको विभत्स तरिकाले हत्या गरिएको अवस्थामा सोही विद्यालयमा शव फेला परेको थियो । सोही विद्यालयको बरण्डामा मंगलबार बिहान ७ बजेतिर बिसीको शव भेटिएको थियो ।

हत्यामा संलग्न महिलालाई प्रहरीले पक्राउ गरी आज सार्वजनिक गरेको हो । गुराँस गाउँपालिका–८ छोटेपोखरीकी २५ वर्षीया मुना रानाले व्यक्तिगत रिसिबीका कारण घाँटी रेटेर शिक्षकको हत्या गरेको स्वीकार गरेकी छन् ।

स्थानीयले खबर गरेपछि जिल्ला प्रहरी कार्यालयका प्रहरी निरीक्षक इन्द्रजीत सुनारको कमाण्डमा प्रहरी चौकी लालिकाँडाबाट प्रहरी खटिएको थियो ।

अनुसन्धानको क्रममा ती महिलाले हत्या गरेको स्वीकार गरेको जिल्ला प्रहरी कार्यालयका प्रहरी नायब उपरीक्षक अनुपम श्रेष्ठले जानकारी दिए ।

ती महिलालाई कर्तव्य ज्यान कसुरको अनुसन्धानका लागि जिल्ला अदालतबाट म्याद थप गरेर हिरासतमा राखिएको प्रनाउ श्रेष्ठले बताए ।