काठमाडौँ । कानून, न्याय तथा संसदीय मामिला मन्त्री ज्ञानेन्द्रबहादुर कार्कीले मुलुकको विकास र समृद्धिका लागि अमेरिकी परियोजना मिलेनियम च्यालेञ्ज च्यालेञ्ज कर्पोरेशन (एमसीसी) आवश्यक रहेको बताएका छन् । शुक्रबार कोशी टप्पुमा प्रकृति संरक्षण कोष मातहतको कोशी टप्पु संरक्षण केन्द्रको कार्यालय उद्घाटन गर्न सुनसरी पुगेका उनले एमसीसी देशका लागि आवश्यक रहेको बताएका हुन् ।

मन्त्री कार्कीले दलीय खिचातानीले एमसीसी ओझेल पर्ने सम्भावना बढाएको भन्दै जसरी भए पनि संसदबाट पास गराउनु पर्नेमा जोड दिए । उनले एमसीसी विकास परियोजना भएकाले यस विषयमा राजनीति गर्नु नहुने बताए । एमसीसी संसदबाट पास गराउन सबैबीच सहमतिको खाँचो रहेको उनले धारणा राखेका थिए ।

मन्त्री कार्कीले असोज ४ गते बस्ने संसद बैठकले बजेटको विषयअघि बढाउने बताए । संसदभित्रको गतिरोध हटाउने विषयमा प्रमुख प्रतिपक्षी दलका नेता केपी शर्मा ओलीसँग छलफल जारी रहेको भन्दै उनले केही दिनभित्रै राजनीतिक निकास निस्कने विश्वास व्यक्त गरे ।

कोशी टप्पु वन्यजन्तु आरक्षमा आजबाट स्थापना भएको कार्यालयले मानव– वन्यजन्तु द्वन्द्व व्यवस्थापनका साथै संरक्षण तथा सम्भाव्यता अध्ययनका विषयमा काम गर्ने बताइएको छ ।