काठमाडौँ । बुद्धभूमि नेपाल हाइड्रोपावरले आइपिओ जारी गर्ने भएको छ । हाइड्रोपावरले आगामी असोज ११ गतेदेखि सर्वसाधारण लगानीकर्ताका लागि ८ करोड रुपैयाँ बराबरको ८ लाख कित्ता आइपिओ जारी गर्ने भएको हो ।

कम्पनीले आयोजना प्रभावित स्थानीय नुवाकोटबासीलाई लक्षित गरी चार लाख कित्ता सेयर बाँडफाँड गरेकोमा दोस्रो चरणमा सर्वसाधारणमा कूल ८ लाख कित्ता सेयर जारी गर्न लागेको हो ।

कम्पनीले ८ लाख कित्तामध्ये ५ प्रतिशत अर्थात् ४० हजार कित्ता सामूहिक लगानी कोष र २ प्रतिशत अर्थात् १६ हजार कित्ता सेयर कर्मचारीका लागि छुट्याएको छ । बाँकी ७ लाख ४४ हजार कित्ता सर्वसाधारणका लागि जारी गर्ने भएको हो ।

इच्छुक आवेदकले सेयर खुल्ला भएको मितिले चार दिनसम्म र ढिलोमा असोज २५ गतेसम्म आवेदन दिन सक्ने कम्पनीले जनाएको छ । लगानीकर्ताले न्यूनतम १० देखि अधिकतम ५० हजार कित्तासम्म आवेदन दिन सक्ने छन् ।