काठमाडौँ । रिबन इन्टरटेनमेन्टले आयोजना गर्दै आएको विवाहित महिलाका लागि नेपालको सबैभन्दा ठूलो प्रतियोगिता ‘मिसेस नेपाल इन्टरनेसनल’ नामक सौन्दर्य प्रतियोगिता ‘मिसेस नेपाल वर्ल्ड’का रुपमा आयोजना हुने भएको छ । सन् २०१९ मा मिसेस नेपाल इन्टरनेसनलको पाँचौ संस्करण सम्पन्न गरेको र सन् २०२० मा कोरोना महामारीले स्थगित हुन गएको कार्यक्रम यस वर्षदेखि परिमार्जित भई आयोजन हुने भएको हो ।

यस वर्ष मिसेस नेपाल वर्ल्डको पहिलो संस्करणको घोषणासँगै कार्यक्रम विजेताले सन् २०२२ को जनवरीमा लस भेगास, अमेरिकामा आयोजना हुने मिसेस वर्ल्डमा नेपालको तर्फबाट प्रतिनिधित्व गर्ने छिन्। यस वर्षदेखि रिबनले आयोजना गर्ने कार्यक्रममा एकै मञ्चबाट मिसेस नेपाल वर्ल्ड र मिसेस नेपाल इन्टरनेसनलका साथै एम एस नेपाल इन्टरनेसनल गरी तीन जना विजेताको छनोट हुने छ ।

यसैगरी मिसेस इन्टरनेसनल नेपाल तथा एम एस नेपाल इन्टरनेसनलका विजेताले नेपाललाई प्रतिनिधित्व गरी सन् २०२२ मा सिंगापुरमा आयोजना हुने मिसेस इन्टरनेसनल तथा एम एस इन्टरनेसनलमा सहभागिता जनाउने छन । यो वर्ष मिसेस वर्ल्डमा नेपालको पहिलो सहभागिता हुने छ ।
विगतमा सामाजिक मुद्दालाई आफ्नो कार्यक्रमको नारा तथा वर्षभरि विजेताले उक्त मुद्दामा केन्द्रीत रही काम गर्नु पर्ने हुँदा यस वर्षलाई मिसेस नेपालले ‘क्यान्सरविरुद्धको जनचेतना अभियानलाई’ वर्षको मुद्दा बनाएको छ ।

यसअघि सम्पन्न मिसेस इन्टरनेसनलमा सबिता लामिछाने, अनुपमा राई, सुरुची पाण्डे, चन्दा थापा गिरी र भाविषा कोइराला चटौतले क्रमसः उपाधी जितेका थिए । कार्यक्रम सम्बन्धि विस्तृत जानकारी तथा कार्यक्रमको तालिका छिट्टै नै पत्रकार सम्मेलनको आयोजना गरी जानकारी गराइने आयोजक संस्था रिबन इन्टरटेनमेन्टले विज्ञप्तिमार्फत जनाएको छ ।