काठमाडौं । आइतबार सल्यान जिल्लाको को बाग्चौर नगरपालिका स्थित एक महिला मृत अवस्थामा फेला परेकी छन् । बाग्चौर नगरपालिका २ गैरी घर भएकी अन्दाजी ५४ वर्षीया रामकली खत्री ठाटीचौरको कच्ची सडकमा मृत अवस्थामा फेला परेकी हुन् ।

प्रहरीका अनुसार शनिवार अपराह्न करिब ५ बजेतिर घरबाट माइत जान्छु भनेर हिँडेकी खत्री घरदेखि करिब एक किलोमिटर दूरीमा पर्ने ठाटीचौर नजिकै सडकमा मृत अवस्थामा भेटिएकी हुन् ।

महिलाको शवलाई नउठाइकन सुरक्षाकर्मीको घेरा लगाएर राखिएको छ । तालिमप्राप्त कुकरबाट अनुसन्धान भएपछि मात्र शव उठाएर पोष्टमार्टम् गरिने बताईएको छ ।

थप अनुसन्धानका लागि कोहलपुरबाट तालिमप्राप्त कुकुरसहित प्रहरी टोली घटनास्थलतर्फ गइरहेको प्रहरीले जनाएको छ ।