काठमाडौँ । केएल टावरले दशैं तिहारका लागि उपहारसहितको ‘रमाइलो दशैं तिहार, हरेक हप्ता उपहारै उपहार’ योजना सुरु गरेको छ । योजनाअन्तर्गत ग्राहकले दैनिक, साप्ताहिक तथा बम्पर उपहारहरू पाउने छन् ।

केएल टावरका अनुसार दैनिक उपहार योजनाअन्तर्गत हरेक दिन एक जोडीलाई एफ क्युब सिनेमाको टिकट, एक हजार रुपैयाँ बराबरको सपिङ भौचरका साथै अन्य आकर्षक उपहारहरू उपलब्ध गराइने छ ।

एक हजार रुपैयाँ वा सोभन्दा माथिको सामान खरिद गर्दा साप्ताहिक रुपमा सिजी ब्राण्डका होम अप्लाइन्सेज, टिभी, फ्रिज, रेफ्रिजिरेटर, वासिङ मेशिन, आइरन, हिटर, भ्याकुम क्लिनरलगायत घरायसी सामग्री उपलब्ध गराइने टावर व्यवस्थापनले जनाएको छ । बम्पर प्राइजमा एक जनालाई टिभिएस अपाचे आरटिआर १६० २ भि वितरण गरिने उपहार योजनाका संयोजक हिरामणि तिमिल्सिनाले बताए ।

चाडपर्वका बेला उपभोक्तालाई प्रोत्साहित गर्ने उद्देश्यका साथ टावरले उपहार योजना सुरु गरेको उनले बताए । असोज १९ गतेदेखि सुरु भएको योजना कात्तिक ३० गतेसम्म लागु हुने उनले जानकारी दिए ।

उपहार योजनामा सहभागी हुनका लागि कम्तीमा एक हजार रुपैयाँ बराबरको सामान खरिद गर्नु पर्ने हुन्छ । हजार वा सोभन्दा बढीको सामान खरिद गरेपछि उपभोक्तालाई कुपन उपलब्ध गराइने छ । सोही कुपनका आधारमा गोला प्रथाद्वारा उपहार विजेता चयन गरिने छ ।

साथै केएल टावरमा घटस्थापनादेखि सिनेमा हलहरुसमेत खुलेका छन् । सिनेमा हलहरु खुलेको र दशैँ लागिसकेका कारण केएल टावरमा अहिले सपिङ्ग गर्नेहरुको चहल पहलसमेत बढेको छ । कोभिडका कारण लामो समयदेखि बन्द जस्तै अवस्थामा रहेका सपिङ्ग मलहरू दशैं नजिकिएसँगै विभिन्न अफरका साथ सञ्चालनमा आउन थालेका छन् ।

टावरमा पचास वटा पसल, ग्रोसरी, फुडकोर्ट, तीन वटा एफ क्युव सिनेमा हल, बालबालिका र युवाका लागि छुट्टाछुट्टै गेमजोन, सामसुङ प्लाजा, फर्निचर सोरुमलगायतका पसल सञ्चालनमा छन् ।