काठमाडौँ । प्रधानमन्त्री शेरबहादुर देउवाले आफैसँग राख्न चाहेको स्वास्थ्य तथा जनसंख्या मन्त्रालय नेकपा एकीकृत समाजवादीको भागमा परेसँगै व्यवसायी उमेश श्रेष्ठ स्वास्थ्य राज्यमन्त्रीबाट हट्ने भएका छन् । उनलाई देउवाले गत साउत १० गते राज्यमन्त्री नियुक्त गरेका थिए ।

राज्यमन्त्री भएको ७५ दिनमा श्रेष्ठ जिम्मेवारी मुक्त हुने भएका हुन् । सुरूका दिनमा विवादमा आएका उनी पछिल्लो समय केही राम्रो काम गर्ने कोशिस गरेसँगै चर्चामा आएका थिए ।

राज्यमन्त्री भएपछि मन्त्री श्रेष्ठले सुरक्षाबाहेक राज्यबाट पाउने सेवा सुविधा नलिने घोषणा गरेका थिए । मन्त्रालय भागबण्डामा स्वास्थ्य मन्त्रालय एकीकृत समाजवादीको भागमा परेपछि उनी पदबाट हट्ने पक्का भएको हो ।

सत्ता गठबन्धन दलका शीर्ष नेताहरुले बिहीबारको बैठकबाट मन्त्रालय बाँडफाँट टुंग्याएर शुक्रबार मन्त्रिपरिषद् विस्तार गर्ने सहमति गरेका हुन् ।