काठमाडौं । असोज २५ गते मोरङ जिल्लाको धनपालथान गाउँपालिका ४ स्थित कर्सियाको विपि चोकमा रहेको सिटिजन्स बैंकको शाखाबाट २१ लाख ७० हजार ५ सय ६३ रुपैयाँ लुटियो । लुटपाटमा संलग्न ८ मध्ये तीन जनालाई प्रहरीले सोही दिन भारत तर्फ भाग्दै गर्दा सीमावर्ती क्षेत्रबाट पक्राउ गरेको थियो ।

जिल्ला प्रहरी कार्यालयले सीमावर्ती क्षेत्रबाट बिजय सहनी(बहरदार),बिराटनगरका ३२ वर्षीय श्याम मुखिया र अररियाका सुनिल यादवलाई पक्राउ गरेको थियो ।

बैंक लुटपाटमा संलग्न भएको आरोपमा प्रहरीले अर्का भारतीय नागरिक रोशन यादवलाई पनि पक्राउ गरेको छ । जिल्ला प्रहरी कार्यालय मोरङले सोमबार भारत अररिया फारवेसगञ्ज १० बस्ने बर्ष २० को रोशन यादवलाई सुनवर्षी नगरपालिका वडा नं ८, सिक्टी, नेपाल चोक नजिक सिमावर्ती एरियाबाट पक्राउ गरेको हो ।

प्रहरीले जहदा गाउँपालिका वडा नं-५ मझारे स्थित अभियूक्त श्याम मुखियाको डेरा कोठामा खानतलासी गर्दा ९ एमएम पेस्तोल थान-१, म्याग्जिन १ र (आधा) के.जी समेत बरामद गरेको छ ।

लुटपाट देखि हत्या सम्म
विराटनगरका मुखिया लुटपाट प्रकरणका मुख्य योजनाकार हुन् । भने बिजय माथि भारतमा साथीको हत्या गरेको आरोप छ ।लुटपाटका क्रममा साथीले चलाएको गोली उनको बाया खुट्टामा लागेपछि उनि घाईते भएका थिए ।

प्रहरीको प्ररम्भिक अनुसन्धानपछि बिजय (सहनी) बहरदारमाथि एक वर्षअघि भारत अररीया जिल्ला गडुरापुर नरपथगञ्ज थाना नजिकै बस्ने २५ वर्षीय शिवशंकर कुमार (सिन्टु)को गोली हानी हत्या गरेको आरोप भएको पत्ता लागेको छ । २०७७ जेठ १४ गते बुधबार राति घर नजिकै सिन्टुको गोली हानी हत्या भएको थियो ।

हत्यापछि सिन्टुका बुबा रामप्रकाश यादवले बिजय बहरदार(सहनी)सहित प्रमोद मण्डल, मुकेश बहरदार, नितिश कुमार,शुशिल बहरदार, श्रवेश यादवसहित ९ जना विरुद्ध जाहेरी दिएका थिए ।

हत्यापछि फरार रहेका बिजय विराटनगर आएका थिए । जिल्ला प्रहरी कार्यालय मोरङका अनुसार सहनी कटहरीको एक कृषि फर्ममा काम गर्दै आएका थिए । सहनी पक्राउपरेपछि भारतमा गरेको अपराधको विषय बाहिर आएको हो । मृतक सिन्टुका आफन्तका अनुसार बिजय अपराधिक गतिविधिमा संलग्न रहदै आएका थिए ।

सोही समूहले असोज २२ गते विराटनगर मेनरोडस्थित वडा प्रहरी कार्यालय छेउको गार्मेन्ट पसल लुटपाट गरेको प्रहरीले बताएको छ । कोटेक्स ट्रेडिङ लुटपाटका क्रममा सो समूहले १२ हजार नगद र ४ वटा स्मार्टफोन लगेको थियो ।