काठमाडौं । अबैध मोबाइलमा रोक लगाउन मोबाइल डिभाइस म्यानेजमेन्ट सिष्टम (एमडीएमएस) लागू गर्ने सरकारको निर्णय अझै कार्यान्वयन हुन नसकेको भन्दै मोबाइल फोन आयातकर्ताहरुले आपत्ति जनाएका छन ।

गत साउन १ गतेदेखि लागू गर्ने भनिएको सो प्रणाली तीन महिना बित्न लाग्दा पनि सरकारले अझै कार्यान्वयन गर्न नसकेकोमा मोबाइल फोन इम्पोटर्स एशोसिएशनले आपत्ति जनाएको हो ।

एशोसिएशनका अध्यक्ष दिपक मल्होत्राले एमडीएमएस लागू गर्ने सरकारको निर्णय छिटोभन्दा छिटो कार्यान्वयन गरी नेपालमा मोवाइल व्यवसायलाई राम्रो ढंगले अघि बढाउने वातावरण बनाउन आग्रह गरे ।

बजारमा अहिले झण्डैझण्डै ५० प्रतिशतको हाराहारीमा अवैध फोन आयात भई विक्री भइराखेको मल्होत्राले बताए ।

नेपालमा गैरकानूनी रुपमा अवैध मोबाइलको आयात रोक्न सकेमा सरकारले राजस्व असुलीबाट धेरै फाइदा लिन सक्ने र व्यवसायीहरुको व्यापार पनि फष्टाउने एशोसिएशनका अध्यक्ष मल्होत्राले दाबी गरेका छन् ।

भन्सार छलेर र चोरी पैठारीमार्फत् अवैध रुपमा भित्रिएका मोबाइल बन्द गर्न सरकारले गत साउन १ गतेदेखिनै एमडीएमएस प्रणाली लागू गर्ने निर्णय गरेको थियो ।