धनगढी । नेपाली कांग्रेसका सभापति शेरबहादुर देउवाले रोकिएको पार्टी अधिवेशनका विषयमा निर्वाचन समितिलाई सोध्न आग्रह गरेका छन् ।

शुक्रबार कैलालीमा पत्रकार सम्मेलनमा बोल्दै अधिवेशन कहिले, कहाँ र कसरी गराउने भन्ने सम्पूर्ण अधिकार केन्द्रीय निर्वाचन समितिलाई दिईएको बताएका हुन् ।

१४औँ महाधिवेशनअन्तर्गत वडा अधिवेशन सुरु भइसकेको भन्दै उनले कोभिड–१९ तथा बाढी–पहिरोजस्ता प्राकृतिक विपत्ति अधिवेशनमा बाधक भएको पनि बताए ।

उनले पार्टीको निर्वाचन समिति पार्टी अधिवेशन गराउन स्वायत्त र स्वतन्त्र समिति भएको उल्लेख गरे ।

उनले भने ,’देशमा निर्वाचन आयोग छ नि, हाम्रो पार्टीमा पनि त्यस्तै निर्वाचन समिति छ । उसको काम निष्पक्ष निर्वाचन गराउने हो । यो स्वतन्त्र छ, अब उहाँहरूको हातमा गइसक्यो । कहिलेदेखि कहाँ–कहाँ चुनाव गराउने सबै उहाँहरूलाई सोध्नुहोस् ।”

१३ जिल्लामा पार्टीको वडा तहको अधिवशेन नै हुनसकेको छैन । प्रदेश नम्बर–२ का आठवटै जिल्लाहरूमा अधिवेशन हुन बाँकी छ ।