काठमाडौं । नेपाल स्टक एक्सचेञ्जमा आबद्ध कम्पनीको शेयर कारोबार मापक नेप्से परिसूचक कारोबार हुने साताको पहिलो दिन आइतबार दोहोरो अंकले वृद्धि भएको छ ।

बजार परिसुचक २७ दशमलव ५१ अंकले वृद्धि भई २ हजार ५ सय ८४ दशमलब ५२ बिन्दुमा पुगेको छ । यो अघिल्लो दिन अर्थात गत विहिबारभन्दा १ दशमलब ८ प्रतिशतले धेरै हो ।

कारोबार हुने साताको अन्तिम दिन गत विहीबार बजार परिसूचक १४ दशमलव ७० अंकले घटेको थियो ।

दशै‌पछि गत आइतबार र बुधबार नेप्से बढ्दा उत्साहित देखिएका लगानीकर्ता अन्य ३ दिन गिरावट आउँदा निराशापन देखिएका थिए । आइतबार केही हरियो संकेतमा सबैमा खुसिपन छाएको छ ।

आइतबार ‘क’ वर्गका कम्पनीको कारोबार मापक सेन्सेटिभ इन्डेक्स ७ दशमलव २४ अंकले वृद्धि भएको छ । कारोबार भएका १३ कम्पनीका उपसुचकमध्ये व्यापार बाहेक अरु सबैले नाफा कमाएका छन् । सबैभन्दा बढी उत्पादन कम्पनी समूहको उपसुचक १०५.५४ अंकले वृद्धि भएको छ ।

आइतबार कारोबार भएका कूल २२५ कम्पनीका ३८ हजार १ सय ४७ कारोबारबाट २ अर्ब ७७ करोड ३४ लाख २० हजार १ सय ३५ रुपैयाँ बराबरका ५८ लाख १८ हजार २५ कित्ता शेयर किनबेच भएको स्टक एक्सचेञ्जले जनाएको छ ।