काठमाडौँ । सर्वोच्च अदालतमा कानून व्यवसायीले प्रदर्शन गरेका छन् । प्रधानन्यायाधीश चोलेन्द्र शमसेर जबराको राजीनामा माग्दै आइतबार कानून व्यवसायीले प्रदर्शन सुरु गरेका हुन् ।

नेपाल बार एशोसिएसनको नेतृत्वमा कानुन व्यवसायीहरुले सर्वोच्च अदालतमा कालोपट्टी बाँधेर विरोध कार्यक्रम गर्दैछन् । बारले आज बिहान १० बजेदेखि ११ बजेसम्म कालोपट्टी बाँधेर सर्वोच्च अदालतमा विरोध गर्न लागेको हो । बारले आजदेखि तीन दिनसम्म विरोध गर्दैछ ।

प्रधानन्यायाधीश जबराले सरकारमा भाग मागेको, भ्रष्टाचार रोक्न नसकेको र न्यायपालिकाको गरिमा कायम राख्न नसकेको भन्दै बारले उनको राजीनामा माग्दै विरोधका कार्यक्रम घोषणा गरेको थियो । प्रधानन्यायाधिश जबराले १६ गतेसम्म राजीनामा नआए विरोधका थप कार्यक्रम घोषणा गर्ने बारले जनाएको छ ।

यस्तै बारको प्रदर्शनलाई लक्षित गरी सर्वोच्च अदालत प्रवेशमा कडाइ गरिएको छ ।