काठमाडौँ । प्रधानन्यायाधीश चोलेन्द्र शमसेर जबराको राजीनामा माग्दै कानून व्यवसायीहरूले प्रदर्शन गरेका छन् । नेपाल बार एशोसिएसनको नेतृत्वमा कानून व्यवसायीहरुले आज पनि प्रदर्शन गरेका हुन् ।

उनीहरुले कालो ब्यानरसहित बारबाट सर्वोच्च अदालत प्राङगणमा पुगेर एक घण्टा धर्ना दिने कार्यक्रम छ । तिहारपछि नयाँ कार्यक्रम घोषणा गर्ने तयारी गरेको बारले आज प्रदर्शनलाई निरन्तरता दिएको हो । यसअघि बारले कात्तिक १४, १५, १६ र १७ गते सर्वोच्चमा आन्दोलन गरेको थियो ।

प्रधानन्यायाधीश जबराले भ्रष्टाचार रोक्न नसकेको र न्यायपालिकाको स्वच्छता, गरिमा कायम राख्न नसकेको भन्दै बारले उनको राजीनामा माग गर्दै आएको छ । सर्वोच्चका न्यायाधीशहरु र बारले जबराको राजीनामा माग्दै आए पनि जबराले राजीनामा नदिने बताएका छन् ।