काठमाडौँ । राष्ट्रिय जनगणना आजदेखि सुरु हुँदैछ । ‘मेरो गणना मेरो सहभागिता’ नाराका साथ आजदेखि १२ औँ राष्ट्रिय जनगणना सुरु भएको हो । जनगणना हरेक १०-१० वर्षमा हुँदै आएको छ । यस वर्ष जनगणना २५ कात्तिकदेखि सुरु भई ९ मंसिरसम्म चल्ने छ ।

जनगणनाका लागि देशभर झण्डै ४० हजार गणक र ८ हजार ५ सय सुपरिवेक्षकहरु परिचालन गरिएको केन्द्रीय तथ्यांक विभागले जनाएको छ । आज बिहान ९ स् ३० बजे राष्ट्रपति विद्यादेवी भण्डारीबाट जनगणनाको सुरुवात गरिनेछ । त्यसपछि बिहान ११ बजे प्रधानमन्त्री शेरबहादुर देउवाको र दिउँसो १ बजे उपराष्ट्रपति नन्दबहादुर पुनको जनगणना गरिने तथ्यांक विभागले जनाएको छ ।

यसअघि जनगणनाको पहिलो चरणमा घर तथा घरपरिवारको सूचीकरण भइसकेको छ । व्यक्तिहरुको विस्तृत विवरण संकलन गर्न ८० वटा प्रश्नावली बनाइएको छ । कालापानी, लिपुलेक र लिम्पियाधुरा क्षेत्रमा सकेसम्म भौतिक रुपमा र नभए स्याटेलाइटका माध्यमबाट अनुमानित जनसङ्ख्या निकाल्ने विभागले बताएकोछ ।

जनगणनाका लागि सरकारले ४ अर्ब रुपैयाँ बजेट छुट्याएको छ । जनगणनाको प्रारम्भिक नतिजा आउन झण्डै तीन महिना लाग्ने अनुमान गरिएको छ । नेपालमा संघीयता कार्यान्वयन भएपछि यो पहिलो जनगणना हो।