काठमाडौं । नेपाल बार एशोसिएसनले आइतबार पनि सर्वोच्च अदालतको मुल गेटमा धर्ना दिने भएको छ ।

प्रधानन्यायाधीशले निकासको बाटो नदिएको कारण आइतबार पनि गेटमै धर्ना दिन लागिएको बारले जनाएको छ ।

प्रधानन्यायाधीश चालेन्द्र शमशेर राणाको राजीनामाको माग गर्दै आएको बारले शुक्रबार प्रधानन्यायाधीशलाई कार्यालय प्रवेशमा रोक लगाउने गरी सर्वोच्च अदालतको मुल गेटमा धर्ना दिएको थियो ।

विहीबार बारको शान्तिपूर्ण आन्दोलनमा प्रहरीले हस्तक्षेप गरेपछि बार थप आन्दोलित भएको हो । बिहीबार सर्वोच्च अदालत परिसरमा प्रहरीले हस्तक्षेप गर्दा ६ जना अधिवक्ताहरू घाइते भएका थिए ।

प्रहरी हस्तक्षेपको विरोध गर्दै बारले शुक्रबार सर्वोच्च अदालतको गेटमा धर्ना दिनुका साथै शुक्रबारका लागि बन्दी प्रत्यक्षीकरणसहितका सबै इजलास बहिष्कार गर्ने निर्णय गरेको थियो ।

नेपाल बार एशोसिएसनको आन्दोलनका कार्यक्रमअन्तर्गत आइतबार देशैभरका अदालतमा धर्ना दिने तयारी गरेको छ ।