पोखरा । अर्थमन्त्री जनार्दन शर्माले भ्रष्टाचार र अनियमितताकाविरुद्ध आफ्नो पार्टीको मुख नहेर्न पार्टी पत्रकारहरुलाई आग्रह गरेका छन् ।

प्रेस सेन्टर गण्डकी प्रदेशको दोस्रो अधिवेशन उद्घाटन गर्दै अर्थमन्त्री शर्माले भ्रष्टाचार र अनियमितताविरुद्ध जोकसैको पनि लेख्न आग्रह गरे । ‘भ्रष्टाचार र अनियमितताका विषयमा पार्टी वा नेताको मुख नहेर्नुस् ।’ – मन्त्री शर्माले भने ।

‘गलत क्रियाकलापकाविरुद्ध कलम चलाउनुस्, मैले गल्ती गरे पनि भण्डाफोर गर्नुस्,’ उनले भने, ‘सत्यलाई स्थापित गर्ने र गलतको विरोध गर्ने दायित्व तपाईँहरुको काँधमा छ ।’

मन्त्री शर्माले उत्पादन र रोजगारी सृजनाको पक्षमा समेत कलम चलाउन पत्रकारहरुलाई आग्रह गरे ।

देशमा आत्मनिर्भर अर्थतन्त्र निर्माणको लागि सरकारले काम गरिरहेको पनि मन्त्री शर्माको भनाई थियो ।

अतिविपन्न परिवार, राजनीतिक आन्दोलनका शहीद परिवार, घाइते अपाङ्ग तथा दीर्घरोगीलाई सरकारले विशेष राहतको कार्यक्रम ल्याएको उनले बताए ।

मन्त्री शर्माले सरकार सदैव प्रेस स्वतन्त्रताको पक्षमा रहेको पनि उल्लेख गरे । यद्यपि विभिन्न प्रदेशहरुमा ल्याइएका आमसञ्चार सम्बन्धि विधेयक पत्रकारको हक हितमा नभएमा सच्याउन पनि उनले सुझाव दिए ।

सरकारले जनताको पक्षमा काम गर्ने र दलहरूबीच बनेको संयन्त्रले प्रतिगमनतर्फ जानबाट मुलुकलाई रोक्ने मन्त्री शर्माले दाबी गरे ।