काठमाडौँ । प्रदेश १ मुख्यमन्त्री राजेन्द्र राईले विश्वासको मत पाएका छन् । उनले बुधबार बसेको प्रदेशसभाको बैठकमा विश्वासको मत पाएका हुन् । ९२ सदस्य रहेको प्रदेशसभामा मुख्यमन्त्री राइको पक्षमा ५०, विपक्षमा २९ मत खसेको थियो । जुन प्रदेशसभाको बहुमत संख्या हो । आजको प्रदेशसभाको बैठकमा ७९ सांसदको उपस्थिति रहेका थियो ।

राई गत कात्तिक १६ गते पाँच दलीय गठबन्धनको तर्फबाट मुख्यमन्त्रीमा नियुक्त भएका थिए । मुख्यमन्त्रीमा नियुक्त भएको दुई सातापछि राईले प्रदेश सभाबाट विश्वासको मत लिएका हुन् ।

संवैधानिक व्यवस्था अनुसार मुख्यमन्त्रीमा नियुक्त भएको एक महिनाभित्र प्रदेशसभाबाट विश्वासको मत लिनु पर्ने छ । प्रदेश १ मा नेकपा एमालेको बहुमत घुमेपछि एमालेका भिम आचार्यले मुख्यमन्त्रीबाट राजीनामा दिएका थिए । उनले राजीनामा दिएपछि गठबन्धनको तर्फबाट राई मुख्यमन्त्रीमा नियुक्त भएका हुन् ।

९२ जना प्रदेशसभा सदस्य रहेको प्रदेश १ मा बहुमतका लागि ४७ सांसदको आवश्यक पर्छ । प्रदेशसभामा गठबन्धनमा ५० सांसद छन् । यस्तै प्रमुख प्रतिपक्षी दल एमालेसँग ४० र राप्रपासँग एक सांसद छन् । यसअघि विश्वासको मत माग्दै मूख्यमन्त्री राईले पक्ष र विपक्ष नभनि मिलेर काम गर्न चाहेको बताएका थिए । उनले विगतका तितामिठा सबै भुलेर प्रतिपक्षसँग पनि मिलेर काम गर्न चाहेको बताए ।