बिराटनगर । नेपाली कांग्रेसका महामन्त्री डा. शशांक कोइरालाले केही दिनभित्रै पार्टी सभापति पदमा उम्मेदवारी घोषणा गर्ने भएका छन् ।
संखुवासभाको तुम्लिङटार विमानस्थलमा बुधबार पत्रकारसँग कुरा गर्दै कोइरालाले आफूले सभापति पदमा नै उम्मेदवारी दिने र छिट्टै नै औपचारिक घोषणा गर्ने बताए ।

पार्टीको १४ औं महाधिवेशनमा आफूले सभापतिमै उम्मेदवारी दिने र औपचारिक रूपमा सभापति पदको उम्मेदवारीे चाँडै घोषणा गर्नेसमेत स्पष्ट गरे ।

उनले आफू पार्टी सभापति पदका लागि बलियो उम्मेदवार भएको पनि दाबी गरे ।

कांग्रेस महामन्त्री कोइरालाले अहिलेको पाँचदलीय गठबन्धन आगामी चुनावमा नहुने बताए ।

सत्ता गठबन्धनका लागि मात्रै कांग्रेसले सहकार्य गरेको उनले बताए । पाँच दलीय गठबन्धन चुनावअघिसम्म मात्रै रहने भन्दै कोइरालाले आगामी चुनावमा कुनै पार्टीसँग कांग्रेसको तालमेल नहुने पनि स्पष्ट गरे ।

चुनावमा कांग्रेस एक्लै लडेर पनि पहिलो पार्टी बन्नेसमेत उनको भनाइ छ ।