कैलाली । नेकपा एमालेको चितवनमा हुन गइरहेको १० औं महाधिवेशनका लागि सुदूरपश्चिम प्रदेशबाट एक सय ६४ जना महाधिवेशन प्रतिनिधि छनोट गरिएको छ ।
प्रदेशका १६ वटै निर्वाचन क्षेत्रमा सो पार्टीले उक्त प्रतिनिधि छनोट गरेको बुधबार धनगढीमा पत्रकार सम्मेलन गरी जानकारी दिएको हो । १६ निर्वाचन क्षेत्रमध्ये १४ वटामा सर्वसम्मतले र बाँकी दुई निर्वाचन क्षेत्रमा निर्वाचन गरेर प्रतिनिधि छनोट गरिएको एमाले सुदूरपश्चिम अध्यक्ष कर्ण थापाले जानकारी दिए ।
कैलालीको निर्वाचन क्षेत्र नम्बर ४ र कञ्चनपुरको निर्वाचन क्षेत्र नम्बर १ बाट भने निर्वाचन गरेर प्रतिनिधि छनोट गरिएको थियो । निर्वाचन भएका क्षेत्रमा पनि सौहार्दपूर्ण वातावरणमा चुनाव भएको अध्यक्ष थापाले दाबी गरेका छन् । ‘अहिलेको महाधिवेशन प्रतिनिधि छनोट एकदमै एतिहासिक भएको छ’, उनले भने । ‘सौहार्दपूर्ण र पक्षपात रहित भएको छ ।’
१६ वटा संघीय निर्वाचन क्षेत्रलाई आधार मानेर नौ वटै जिल्लाबाट महाधिवेशन प्रतिनिधि छनोट गरिएको अध्यक्ष थापाले बताए ।
भीम रावल पक्षलाई पाखा लगाएर अगाडि बढ्नु भएको छ नी ? भन्ने पत्रकारको प्रश्नमा उनले भने । ‘एमालेमा कुनै पनि गुट छैन् । सबैलाई समेटेर अगाडि बढेको छौँ ।’ राष्ट्रिय महाधिवेशनका लागि कैलालीका पाँचवटै निर्वाचन क्षेत्रबाट ४४ जना प्रतिनिधि छनोट गरिएको छ ।
यस्तै दार्चुलामा १२ बझाङ १६, बैतडीमा १४, डडेल्धुरामा ११, बाजुरामा २१, कञ्चनपुरमा १६, डोटीमा १६ र अछामबाट १४ जना प्रतिनिधि छनोट गरिएको एमाले प्रदेश कमिटिले जनाएको छ ।