काठमाडौं । नेपाली कांग्रेसको १४ औं केन्द्रीय महाधिवेशन आउन मात्र २१ दिन बाँकी छ । तर (संस्थापन र इतर ) ‘प्यानल’ उम्मेदवारहरुको सूचिका विषयमा औपचारिक छलफल दुवै समुहमा नहुदा कांग्रेस पदाधिकारीका आकांक्षी अलमलमा परेका छन् ।

कुन पदमा उठ्ने टुंगो नलाग्दा तयारी गर्न नपाएको भन्दै नेताहरुको गुनासो देखिन्छ । दुवै टिमका नेताहरूको मुख्य नजर मंसिर ६ मा हुने क्षेत्रीय अधिवेशनमा केन्द्रित छ ।

अहिले विभिन्न पदमा उम्मेदवारी घोषणा गरेका नेताहरुले आफू कुन समुहमा उठ्ने भनेर खुलाएका छैनन् । तर प्रधानमन्त्री एवम् सभापति शेरबहादुर देउवाले गत बिहिबारदेखि नै आफ्नो गुटका नेताहरुसँग कसरी अघि बढ्ने र महाधिवेशन जित्ने विषयमा छलफल सुरु गरेका छन् ।

देउवाले सोमबार आफ्नो समूहको बैठकमा पार्टीको प्रतिनिधिसभा निर्वाचन क्षेत्रीय अधिवेशन सकिनासाथ पदाधिकारीसहित केन्द्रीय सदस्यहरूको टिम बनाउने बताएका थिए । तर देउवाले बनाउन खोजेको पदाधिकारीको टिममा को–को अटाउँछन् भन्ने उनले खुलाएनन् । उनले उक्त टिमको सभापति भने आफै हुने दाबी मात्र गरिरहे ।

सोही बैठकमा गोपालमान श्रेष्ठले यो पटक आफू पनि सभापतिमा उठ्ने पुनः दोहोर्याए । तर देउवाले अहिले म उठ्छु मलाई सहयोग गर्नु भनेर श्रेष्ठलाई भनेको सोही बैठकमा उपस्थित एक नेताले मेरो न्युजसँगको कुराकानीमा भने ।

‘सभापतिज्युले गोपालमानदाईलाई बढी जिद्धि नै गर्ने हो भने ठीक छ, उठे हुन्छ, बिमलेन्द्र जस्तै शुभकामना भन्नुभयो !’– ती नेताले भने ।
निधि अब आफ्नो टिममा नर्फने हुँदा बलियो भएर तयारी गर्न पनि देउवाले आफ्ना समुहका नेताहरुलाई भनेका थिए ।

संस्थापन पक्षमा देखिदै आएका विश्वप्रकाश शर्माले महामन्त्री घोषणा गरे पनि सभापतिको टुङ्गो नलाग्दा कुन टिमबाट मैदानमा आउने अझै भनेका छैनन् ।

यता, संस्थापन इतर (पौडेल समुह) मा सभापतिका प्रत्यासी चार जना हुँदा को सभापति भन्नेमै सकस देखिएको छ । जसमा बरिष्ठ नेता पौडेलसहित महामन्त्री सशांक कोइराला, पूर्वमहामन्त्री प्रकाशमान सिंह र केन्द्रीय सदस्य शेखर कोइराला आकांक्षी छन् । यीमध्ये एक जना सभापतिको टु्ङ्गो नलाग्दा पदाधिकारीमा उठ्ने नेताहरु अन्योलमा परेका हुन् ।

१३ औं महाधिवेशनमा कृष्णप्रसाद सिटौलाले देउवालाई सघाएका थिए । अहिले सिटौलाले आफै सभापति उठ्ने बताए पनि उनले पनि अहिलेसम्म टिम बनाएका छैनन् । सभापतिको टुंगो नलाग्दा अन्य पदाधिकारीको प्यानल बनेको छैन ।

पहिला सिटौंला समूहबाट १३ औं महाधिवेशनमा महामन्त्री उठेका गगन थापाले १४ औं महाधिवेशनमा समुह परिवर्तन गरेको संकेत गरे पनि आफु कुन प्यानलबाट उठ्ने खुलासा गरेका छैनन् । उनी भदौं १७ गते पौडेल समुहको बैठकमा देखिएका थिए ।

देउवासँग प्रतिस्पर्धा गर्न संस्थापनइतर समूहले साझा उम्मेदवार छान्ने भने पनि अझै छान्न सकेका छैनन् । वरिष्ठ नेता रामचन्द्र पौडेलले नेतृत्व गरेको उक्त समूहबाट सभापतिका लागि चार जना आकांक्षी देखिएका छन् । जसमा महामन्त्री शशांक कोइराला, पूर्वमहामन्त्री प्रकाशमान सिंह र केन्द्रीय सदस्य शेखर कोइराला छन् ।

पार्टी र सत्ताको केन्द्रमा रहेका देउवासँग प्रतिस्पर्धा गर्न सहज नभएको भन्दै यस समूहका युवा नेताहरुले सभापतिको प्रतिस्पर्धामा एक जनामात्रै अघि सर्न दबाब दिँदै आएका छन् ।

१४ औं महाधिवेशनबाट सभापति, दुई उपसभापति, दुई महामन्त्री र आठ सहमहामन्त्रीसहित १३ पदाधिकारी निर्वाचित हुन्छन् । कोषाध्यक्ष मात्र मनोनित हुनेछन् ।

क्षेत्रीय अधिवेशनबाट कांग्रेसका ४ हजार १ सय २४ महाधिवेशन प्रतिनिधि चयन भएर आउँछन् । त्यसले पनि कुन समुह बलियो रहेको देखाउँछ । अर्को, विदेशस्थित जनसम्पर्क समिति, भ्रातृ तथा शुभेच्छुक संस्थाका प्रतिनिधि गरेर करिब ४ हजार ५ सयको हाराहारीमा महाधिवेशन प्रतिनिधि आउनेछन् ।

कांग्रेसको केन्द्रीय महाधिवेशन मंसिर २४ देखि २६ काठमाडौंमा हुँदैछ ।