काठमाडौँ । नेपाली कांग्रेसको १४ औँ महाधिवेशनअन्तर्गत रुपन्देहीमा भएको निर्वाचनमा झडप भएको छ । जिल्लाको क्षेत्र नम्बर ३ ‘क’को मतगणना चलिरहँदा झडप हुँदा पाँच जना घाइते भएका छन् ।

कांग्रेसको पार्टी कार्यालय भैरहवामा मतगणनाका क्रममा गएराति दुई पक्षबीच झडप भएको हो । झडपमा पार्टीका वरिष्ठ नेता रामचन्द्र पौडेल पक्षका नेता तथा कार्यकर्ता घाइते भएका छन् ।

प्रधानमन्त्री तथा पार्टी सभापति शेरबहादुर देउवा पक्षको आक्रमणबाट क्षेत्रीय सचिवको उम्मेदवार तथा नेविसंघ रुपन्देहीका पूर्वअध्यक्ष शैलेश पन्थ गम्भीर घाइते भएका छन् । उनको लुम्बिनी प्रादेशिक अस्पतालमा उपचार भइरहेको छ ।

बत्ती अफ गरेर आक्रमण गरेको पौडेल पक्षले जनाएका छन् । जिल्लामा कांग्रेसको नेतृत्व चयन गर्न ३३८ मतदाता रहेका छन् ।