काठमाडौँ । नेपाल विद्युत प्राधिकरणले सबै नेपाली नागरिकको घरमा बिजुली गुर्याउने बताएको छ । विद्युत प्राधिकरणले सूचना जारी गर्दै चालु आर्थिक वर्षमा सबैको घरमा विद्युत् पुर्याउने बताएको हो ।

प्राधिकरणका अनुसार देशभर कुल ६२ लाख १८ हजार ३ सय ९५ घरधुरी रहेकोमा तीमध्ये ८९.७० प्रतिशत जनसंख्या राष्ट्रिय प्रसारण लाइनको पहुँचमा गुगेका छन् ।

प्रदेश १ मा ८६.९५ प्रतिशत, प्रदेश २ मा ९९.६६ प्रतिशत, वाग्मतीमा ९५.९१ प्रतिशत, गण्डकीमा ९५.६८ प्रतिशत, लुम्बिनीमा ९४.९१ प्रतिशत, कर्णालीमा ४३.८७ प्रतिशत र सुदूरपश्चिममा ७१.०७ प्रतिशत घरधुरीमा बिजुली पुगेको प्राधिकरणले जनाएको छ ।

प्राधिकरणको तथ्यांकअनुसार विद्युत् पहुँचमा प्रदेश २ सबैभन्दा अगाडि छ भने कर्णाली प्रदेश सबैभन्दा पछाडि रहेको छ । कर्णाली प्रदेशका चार जिल्लामा विद्युत् सेवा पुग्न सकेको छैन । ती जिल्लामा केन्द्रीय प्रसारण लाइनको बिजुली उपलब्ध गराइने विद्युत् प्राधिकरणले जनाएको छ ।

प्राधिकरणको पछिल्लो तथ्यांक अनुसार ७५३ स्थानीय तहमध्ये ४७१ स्थानीय तहमा ९० देखि १०० प्रतिशत नै विद्युतीकरण भएको छ । यस्तै, ११३ स्थानीय तहमा ६५ देखि ९० प्रतिशत विद्युतीकरण भएको छ । ४५ स्थानीय तहमा ३५ देखि ६५ प्रतिशत, ६३ स्थानीय तहमा पाँचदेखि ३५ र ६१ स्थानीय तहमा पाँच प्रतिशतको हाराहारीमा मात्रै बिजुली उपलब्ध भएको छ । अझै १०.३ प्रतिशत नागरिक बिजुलीबाट बञ्चित रहेको प्राधिकरणको सूचनामा उल्लेख गरिएको छ ।