काठमाडौं । नेकपा एमालेको दशौं महाधिवेशनबाट ३ सय १ सदस्य केन्द्रीय कमिटी निर्वाचित हुने भएका छन् ।

शुक्रबार राति बसेको केन्द्रीय कमिटीको अन्तिम बैठकले केन्द्रीय सदस्यको संख्या बढाउने निर्णय गरेको थियो । विधान महाधिवेशनले २२५ सदस्यीय केन्द्रीय कमिटी रहने व्यवस्था गरेको थियो ।

केन्द्रीय कमिटीको अन्तिम बैठकको निर्णयअनुसार, एमाले केन्द्रीय कमिटीमा अध्यक्ष १, बरिष्ठ उपाध्यक्ष १, उपाध्यक्ष ६, महासचिव १, उपमहासचिव ३ र सचिव ७ जना गरी १९ सदस्यीय पदाधिकारी (सचिवालय) रहनेछ ।

यस्तै, ४५ सदस्य स्थायी समिति र ९९ सदस्य पोलिटब्यूरो बन्नेछ । स्थायी समिति र पोलिटब्यूरो भने महाधिवेशनपछि केन्द्रीय कमिटीबाट चयन गरिनेछ ।

यस्तै, एमाले महाधिवेशनबाट केन्द्रीय अनुशासन आयोग, केन्द्रीय लेखा आयोग, केन्द्रीय निर्वाचन आयोग निर्वाचित हुनेछ ।
अनुशासन आयोगमा अध्यक्ष, उपाध्यक्ष र सचिव एक एक जना हुनेछन् भने सदस्य संख्या २२ रहनेछ ।

लेखा आयोगमा पनि अध्यक्ष, उपाध्यक्ष र सचिव एक एक जना र सदस्य संख्या २२ नै रहनेछ । सल्लाहकार परिषद् भने केन्द्रीय कमिटीले मनोनयन गर्नेछ ।