काठमाडौँ । चितवनमा जारी नेकपा एमालेको १० औँ महाधिवेशनमा अध्यक्ष पदमा दाबी गरेका उपध्याक्ष भिम रावलले आफूनिकट नेता तथा कार्यकर्तासँग छलफल सुरु गरेका छन् । उनले शनिबारको बन्दसत्रमा समेत अध्यक्षमा दाबी गरेका थिए ।

बन्दसत्र स्थल होटल सेभेन स्टारमा उनले आफूनिकट नेता तथा कार्यकर्तासँग छलफल सुरु गरेका हुन् । छलफलमा उपस्थित रहेका नेताहरू भने गोप्य राखिएको छ ।

बन्दसत्रको पहिलो दिन हिजोको निर्णयले पार्टीको पदाधिकारी तथा केन्द्रीय सदस्य छान्ने जिम्मा अध्यक्ष ओलीलाई दिएको थियो । लगत्तै उपाध्यक्ष रावलले लोकतान्त्रिक विधि र पार्टीको विधानविपरीत भएको भन्दै असन्तुष्टि जनाएका थिए ।

अध्यक्षबाट उम्मेदवारी फिर्ता लिन दबाब आइरहँदा रावलले अधिकार कुण्ठित गर्न खोजेको बताएका छन् । ‘यसबीच मैले अध्यक्ष पदमा उम्मेदवारीको घोषणा गरिसकेको छु, म उम्मेदवारी दिन्छु,’ उनले भने, ‘अरु कमरेडहरूले पनि दिनु हुन्छ, यो अधिकार कुनै हालतमा कुण्ठित गर्न मिल्दैन, कुण्ठित हुँदैन ।’