काठमाडौँ । राष्ट्रिय प्रजातन्त्र पार्टी राप्रपामा उम्मेदवारी दर्ता सुरु भएको छ । राप्रपाको एकता महाधिवेशनमा अध्यक्ष पदका उम्मेदवारले उम्मेदवारी दर्ता गर्न लागेका हुन् । राप्रपाका नेता राजेन्द्र लिङ्देन बाजागाजासहित अध्यक्षमा उम्मेदवारी दिन पुगेका छन् ।

लिङ्देन सहितका नेता–कार्यकर्ता बाजागाजासहित राष्ट्रियसभागृहमा उम्मेद्वारी दर्ता गर्न पुगेका हुन् । यस्तै अध्यक्ष कमल थापा पनि अध्यक्ष पदमा उम्मेदवारी दिन गुगेका छन् । थापा पनि बाजागाजासहित राष्ट्रिय सभागृहमा उम्मेदवारी दर्ता गर्न पुगेका हुन् ।

राप्रपाको अध्यक्षका लागि कमल थापा र लिङ्देन प्यानलसहित चुनावी मैदानमा रहेका छन् । बिहीबारबाट सुरु भएको राप्रपाको महाधिवेशनमा शनिबार मतदान हुने कार्यक्रम रहेको छ ।

राप्रपा महाधिवेशनमा ४ हजार ४ सय जना महाधिवेशन प्रतिनिधि छन् । महाधिवेशनमा अध्यक्षबाहेक ४ उपाध्यक्ष, ३ महामन्त्री र १ सय ४१ जना केन्द्रीय सदस्य चयनका लागि विद्युतीय मेसिनबाट मतदान हुनेछ ।