काठमाडौं । नेपाली कांग्रेसको संस्थापन इतर समूहको दुई दिनसम्मको लगातारको छलफलले निकास दिन नसकेपछि बुधबार विहानैदेखि फेरि छलफलमा जुट्ने भएका छन् ।

बुधबार विहान काठमाडौंको अनुपम फुडल्याण्डमा जुट्ने गरी मंगलबार प्रकाशमान सिंहको निवास चाक्सीबारमा बसेको ६ घण्टा लामो बैठक सकिएको छ ।

प्रकाशमान सिंह निवास चाक्सीबारीमा भएको छलफलपछि बरिष्ठ नेता पौडेलले साझा उमेदवार बनाउने विषयमा सबै सहमति नजिक पुगेको बताउँदै भोलि (बुधबार) बेलुकासम्म सार्वजनिक गर्ने बताएका हुन् । उनले भने, ‘सहमतिको निकै नजिक पुगेका छौँ । भोलि बेलुकासम्म हामीले साझा उम्मेदवार तोक्छौँ ।’

त्यसैगरी, डा. शशांक कोइरालाले आफूले रामचन्द्र पौडेलका लागि आफ्नो दाबी छाडेको बताए । उनले भने– ‘रामचन्द्र पौडेल जीले एकपटकका लागि मलाई छाडिदिन भन्नुभयो । मैले छाड्न तयार भएको हँु ।’