एमाले नेताहरूको जिम्मेवारी बाँडफाँड, वरियता तोकियो (अपानीसहित)

मेरोन्यूज २०७८ पुष २ गते ८:३५

काठमाडौँ । नेकपा एमालेले दसौँ राष्ट्रिय महाधिवेशनपछि बसेको पहिलो र दोस्रो बैठकपछि पहिलो अन्तरपार्टी निर्देशन–१ (अपानी)जारी भएको छ । अपानीमा बैठकमा भएका सबै निर्णयहरु पठाइएको छ ।

केन्द्रीय कमिटीबाट गरिएको जिम्मेवारी बाँडफाँड, वरियता निर्धारण, केन्द्रीय सदस्यहरुको मनोनयनसम्म समेटिएको र जनवर्गीय संगठनको अधिवेशन, जिल्ला र प्रदेश अधिवेशनहरुको मिति समेत समेटिएको छ । पार्टीका निर्णय तथा निर्देशलाई तल्ला कमिटीमा पठाउन एमालेले अन्तर पार्टी निर्देशन जारी गर्ने गर्दछ ।

एमाले महासचिव शंकर पोखरेलले अन्तर पार्टी निर्देशन–१ केन्द्रीय पदाधिकारी तथा सदस्यहरु र प्रदेश तथा जिल्ला कमिटीले पाउने गरी इमेल गरिएको जानकारी दिए । एमालेले महाधिवेशनपछिका निर्णयहरु सार्वजनिक गर्न शुक्रबार (आज)नै पत्रकार सम्मेलन पनि गर्दै छ ।

एमालेले पार्टी इतिहासमा पहिलोपटक विधान महाधिवेशन र राष्ट्रिय महाधिवेशन अलग–अलग रुपमा आयोजना गरेको थियो । विधान महाधिवेशनबाट राजनीतिक प्रतिवेदन, संगठनात्मक प्रस्ताव र विधान संशोधन प्रस्ताव सर्वसम्मत रुपमा पारित गरी कार्यान्वयनमा आइसकेका छन् ।

अपानीमा राष्ट्रिय महाधिवेशनले पार्टी विधानमा आंशिक संशोधन गर्नुका साथै ३०१ सदस्यीय केन्द्रीय कमिटी निर्वाचित गरेको थियो । अन्तर पार्टी निर्देशनमा महाधिवेशनबाट नवनिर्वाचित केन्द्रीय कमिटीको चितवनमा बसेको पहिलो पूर्ण बैठक र मंसिर २५ र २६ गते जर्मन होम्स हस्पिटालिटी, भक्तपुरमा बसेको दोस्रो पूर्ण बैठकका निर्णयहरु पठाइएको एमालले जनाएको छ ।