काठमाडौँ । नेकपा एमाले चितवनको १० औँ जिल्ला अधिवेशन शुक्रबारदेखि सुरु हुँदै छ । २३ र २४ पुसमा हुने अधिवेशनबाट नयाँ जिल्ला कमिटी बन्ने छ । एमाले चितवनको अधिवेशनको उद्घाटनसत्र तारापुञ्ज रिसोर्ट र बन्दसत्र पार्टी कार्यालयमा हुने भएको छ ।

अधिवेशनका लागि जिल्लाका सात स्थानीय तह र पेसागत संगठनहरूबाट एक हजार ६ सय प्रतिनिधि छनोट भएका छन् । यसअघि एमालेको गाउँ नगर कमिटी र वडा कमिटी सर्वसम्मतबाट चयन भइसकेको छ ।

एमाले चितवनको अध्यक्षमा सर्वसम्मतिले नेतृत्व चयन गर्ने नेताहरूले बताइरहँदा अध्यक्षको लागि चार जनाले आकांक्षा देखाएका छन् । अध्यक्षको लागि रामप्रसाद न्यौपाने, तेजेन्द्र खड्का, कृष्ण भुर्तेल र कमल पाठकले आकांक्षा देखाएका छन् ।

अध्यक्षका आकांक्षी न्यौपाने एमाले र माओवादी केन्द्रबीच एकता भएपछि बनेको नेकपाको भरतपुर महानगर कमिटी अध्यक्ष थिए । दुई पार्टीको एकता खारेज भइसकेपछि एमाले भरतपुर महानगरको कमिटी अध्यक्षको जिम्मेवारी पनि न्यौपानेले नै पाए ।

त्यसपछि भएको एकता अधिवेशनबाट नयाँ नेतृत्व चयन भयो । जिल्ला अध्यक्ष बन्ने इच्छा बनाएका न्यौपानेले पुनः महानगको अध्यक्षको लागि चासो दिएनन् । उनी नेकपा अध्यक्ष केपी ओली निकट मानिन्छन् ।

एमाले चितवनको २०७३ सालमा भएको अधिवेशनबाट तेजेन्द्र खड्का जिल्ला कमिटी उपाध्यक्षमा निर्वाचित भएका हुन् । तत्कालीन एमालेमा माधव कुमार नेपाल निकटका खड्का एमाले र माओवादी बीच भएको एकता खारेज भएपछि केही समय विचलित हुन पुगे । र, अन्ततः एमालेमै रहने उनले उद्घोष गरे ।

जिल्ला अध्यक्षका अर्का आकांक्षी कृष्ण भुर्तेल बागमती प्रदेशका सांसद हुन् । २०३५ सालदेखि कम्युनिस्ट राजनीतिमा सक्रिय छन् । अर्का आकांक्षी कमल पाठक बार एसोसिएसन चितवनका पूर्व अध्यक्ष हुन् । उनले २०४३ सालबाट राजनीति सुरु गरेका हुन् ।