काठमाडौं । माओवादी केन्द्रका प्रभावशाली नेता वर्षमान पुन आज स्वदेश फर्किदैछन् । उपचारका क्रममा दुई महिनादेखि चीनमा रहेका वर्षमान पुन ‘अनन्त’ आज स्वदेश फर्कन लागेको उनको सचिवालयले जनाएको छ ।

चीनको सेनजेनस्थित थर्ड पिपुल्स अस्पतालमा जण्डिसको उपचार गराएका पुन आज अपरान्ह चार्टर विमानमार्फत् नेपाल आउने लागेका हुन् ।
उनीसँगै पूर्वसभामुखसमेत रहेकी पत्नी ओनसरी घर्ती पनि नेपाल आउनेछिन् ।

वंशाणुगत जण्डिसका बिरामी पुनको त्यसअघि जावलाखेलस्थित सुमेरु अस्पतालमा उपचार भएको थियो । तर, त्यहाँ उपभार सम्भव नभएपछि चिकित्सककको परामर्शमा उनी १३ असोजमा थाइल्याण्डको राजधानी बैंकक पुगेका थिए । थाइल्याण्डमा पनि उनको उपचार सन्तोषजनक नभएपछि चीनमा लगिएको थियो ।

त्यसपछि १० मंसिरमा उनलाई चीन लगिएको हो ।

पुन माओवादी केन्द्रमा महासचिवको दावेदार छन् । उनी चीनमा रहेकाले माओवादीले अहिलेसम्म पदाधिकारी चयन गरेको छैन । २७ माघका लागि अव माओवादी केन्द्रले पदाधिकारी चयन देखिका नेताहरुको कार्यविभाजन सम्मको निर्णय लिन केन्द्रीय समितिको बैठक बोलाएको छ ।

माओवादीको महाधिवेशनमा समेत उपचारका क्रममा रहेका कारण पुन सहभागी हुन पाएका थिएनन । तर उनले पार्टीको महासचिवमा आफनो दावी कायम रहेको सन्देश अध्यक्ष प्रचण्डलाई पठाएपछि प्रचण्डले पुन सहितको सहभागितामा पदाधिकारी चयन गर्ने भन्दै अहिलेसम्म पदाधिकारी चयन रोकिएको छ ।