कैलाली । सर्वाधिक धनराशीको ‘मुख्यमन्त्री पाँचौं अन्तर्राष्ट्रिय सुदूरपश्चिम खप्तड गोल्डकप–२०७८’ फागुनमा हुने भएको छ ।

आयोजक सुदूरपश्चिम–११ स्पोर्टस क्लबले बुधबार धनगढीमा पत्रकार सम्मेलन गरेर गोल्डकप आउँदो फागुन १९ देखि २८ गतेसम्म हुने मिति सार्वजनिक गरेको हो ।

प्रतियोगितामा पाँच वटा ‘ए’ डिभिजन, दुई मोफसलका, दुई विदेशी र एक आयोजक गरेर १० टिमको सहभागिता रहने क्लवका महासचिव प्रकाश शाहीले बताए ।

उनका अनुसार प्रतियोगिताको विजेता टिमले २१ लाख र उपविजेता टिमले १० लाख (कर कट्टा गरेर) प्राप्त गर्ने छन् ।

प्रतियोगितमा उत्कृष्ट गोलकिपर, डिफेन्डर, स्टाइगर, मिड–फिल्डर, सर्वाधिक गोलकर्ता, उदयमान खेलाडी र कोचलाई २० हजारका दरले पुरस्कार प्रदान गरिने उनले बताए ।

प्रतियोगिताको अनुमानित लागत एक करोड ५० लाख भन्दा बढी हुने आयोजकले जनाएको छ ।

सुदूरपश्चिम प्रदेश खेलकुद परिषद्का सदस्य सचिव दीपकबहादुर सिंहले आफू जिल्ला खेलकुदको अध्यक्ष रहँदादेखि नै क्लब मार्फत खेलकुद प्रतियोगिता आयोजना गर्नमा लागिपरेको बताए ।

सिङ्गो खेलकुद जगत र क्लबलाई जोगाउन लागि अहिले पाँचौँ संस्करणमा प्रवेश गरेको प्रतियोगितालाई निरन्तरता दिन सबैलाई हातेमालो गर्न आग्रह गरे ।

प्रायोजक र सह–प्रायोजकसहित विभिन्न उद्योग, व्यवसायीहरुको सहयोगबाट चार संस्करण पूरा गरेको खप्तड गोल्डकपमा यसवर्ष प्रदेश सरकारकै सहयोग रहेका कारण केही राहत भएको क्लबका अध्यक्ष सुरेश हमालले बताए ।

कोरोना महामारीका कारण जारी निषेधाज्ञाले एक वर्ष प्रतियोगितालाई अघि बढाउन नसकेको हमालले बताए ।

यस्तै, धनगढी उपमहानगरपालिकाले पनि गोल्डकपलाई सहयोग गर्ने आश्वासन दिइसकेको उनले बताए । पाँचौँ संस्करणको मुख्यमन्त्री सुदूरपश्चिम खप्तड गोल्ड कप फुटबल प्रतियोगितामा अनुमानित दैनिक पाँच हजार दर्शकले खेल अवलोकन गर्ने र अप्रत्यक्ष रूपमा ५० लाख बढी दर्शकहरूले खेलकुदबारे जानकारी पाउने आयोजकको दाबी छ ।