सुर्खेत । कर्णाली प्रदेशको मन्त्रिपरिषदलाई पूर्णता दिइएको छ । आइतबार पाँच मन्त्री नियुक्त गरेसँगै मन्त्रिपरिषदले पूर्णता पाएको हो ।

नवनियुक्त पाँच मन्त्रीले आइतबार पद तथा गोपनीयताको शपथ लिएका छन् । प्रदेश प्रमुखको कार्यालयमा आयोजित कार्यक्रममा प्रदेश प्रमुख तिलक परियारले पाँचै जना मन्त्रीलाई सपथ दिलाएका थिए ।

गठबन्धनको तर्फबाट मुख्यमन्त्री बनेका जीवनबहादुर शाहीले आइतबार नेपाली कांग्रेस, माओवादी केन्द्र र एकीकृत समाजवादीबाट पाँचजना मन्त्री नियुक्त गरेका हुन् ।

आज सपथ लिनेमा काँग्रेसको तर्फबाट सामाजिक विकास मन्त्री यज्ञबहादुर बिसी र आन्तरिक मामिला तथा कानुनमन्त्री हिमबहादुर शाही तथा माओवादी केन्द्रबाट गणेशप्रसाद सिंह जलस्रोत तथा ऊर्जामन्त्री र छिरिङ दमदोल लामा (कार्चेन) उद्योग, पर्यटन, वन तथा वातावरण मन्त्री र एकीकृत समाजवादीबाट पदमबहादुर रोकाया भौतिक, पूर्वाधार तथा सहरी विकासमन्त्रीमा नियुक्त भएका छन् ।

माओवादीबाट मन्त्री बनेका हुम्लाका छिरिङ दमदोल लामा गैरसांसद हुन् ।

यसअघि माओवादीबाट विन्दमान विष्ट आर्थिक मामिला तथा योजनामन्त्री बनिसकेका छन भने एकीकृत समाजवादीबाट दलबाट चन्द्रबहादुर शाही भूमि व्यवस्था, कृषि तथा सहकारी मन्त्री छन् ।